Францускиот претседател Емануел Макрон денес пристигна во Белата куќа на разговори со американскиот претседател Доналд Трамп, на кои се очекува да зборуваат за завршување на војната во Украина во услови на големи разлики за тоа како да се продолжи.
Макрон стана првиот европски лидер да го посети Трамп откако тој ја врати власта пред еден месец.
Двајцата лидери треба да учествуваат на повикот на Г7, да одржат билатерални разговори, а потоа да претседаваат со заедничката прес-конференција закажана за 14 часот.
Британскиот премиер Кир Стармер треба да го посети Трамп подоцна во текот на неделата, во услови на тревога во Европа поради заострувањето на ставот на Трамп кон Украина и предлозите за Москва за тригодишниот конфликт.
Се очекува Макрон и Стармер да се обидат да го убедат Трамп да не брза со договорот за прекин на огнот со рускиот претседател Владимир Путин по секоја цена, да ја задржат Европа вклучена и да разговараат за воените гаранции за Украина.
Трамп и неговиот тим преговараа за договор за поделба на приходите со Украина за да повратат дел од парите што претходната администрација на Бајден му ги испрати на Киев во форма на оружје за да ја одбие Русија.
Трамп во текот на викендов рече дека верува оти наскоро ќе биде постигнат договор.
Украинскиот претседател Володимир Зеленски минатата среда ги отфрли барањата на САД за 500 милијарди долари минерално богатство од Украина за враќање на Вашингтон за воената помош, велејќи дека САД досега не ја доставиле ни приближно таа сума и не понудиле конкретни безбедносни гаранции во договорот.
Макрон се обидува да ги искористи односите со Трамп изградени за време на нивните први претседателски мандати.
„Ќе му кажам: длабоко во себе не можете да бидете слаб пред претседателот (Путин)“, рече тој пред посетата на Белата куќа денес.
