Соединетите држави ги оценуваат мерките против владата на венецуелскиот претседател Николас Мадуро, откако опозицискиот кандидат Едмундо Гонзалес беше принуден да побара политички азил во Шпанија. Според податоците собрани од локалните набљудувачи и објавени од опозицијата, Гонзалес добил најмногу гласови на претседателските избори на 28 јули.

„Ништо не е надвор од масата и во тесна координација со нашите партнери, вклучително и оние со кои редовно се занимаваме за ова, разгледуваме низа опции за да им покажеме на Мадуро и неговите претставници дека нивното неправилно владеење, нивното репресирање на човековите права, нивното непочитување на демократијата и слободните и фер избори имаат реални и легитимни последици”, истакна Ведант Пател, заменик портпарол на Стејт департментот.

Излегувањето на 75-годишниот Гонзалес било координирано меѓу владите на Шпанија и Венецуела, според венецуелскиот јавен обвинител Тарек Сааб.

„Владите на Шпанија и Венецуела се согласија да обезбедат безбеден премин за граѓанинот Едмундо Гонзалес Урутија за да може да ја напушти територијата на државата и да го добие азилот што му го додели Шпанија. Како последица на тоа, ова министерство изразува апсолутна почит кон одлуките на венецуелската извршна власт, која го одобрила соодветниот безбеден премин со почитување на правото на азил загарантирано со венецуелскиот устав во член 69”, изјави Сааб.

Администрацијата на Бајден воведе санкции против компании и членови на владата во Венецуела. И САД и другите ги користеа овие мерки како потпора за договори за посредување, како што е договорот од Барбадос минатата есен, кој ги наведе условите за конкурентни избори во Венецуела.

Сепак, лидерката на опозицијата Марија Корина Мачадо, на која и беше забрането да учествува на изборите, вели дека САД не направиле доволно.

„Сметам дека Соединетите Држави треба да направат многу повеќе и јас бев многу јасна и со нив и со другите земји. Мислам дека сторителите на кршење на човековите права и злосторства против човештвото треба да знаат дека народот ќе биде повикан на одговорност затоа што тоа им испраќа порака на останатите да не го прават тоа, не само во војската, туку и во правосудниот систем", посочи Мачадо.

Белата куќа ги засили своите повици за транспарентност и објавување на податоците од гласањето.

„Она што треба да се случи следно е г-дин Мадуро да го послуша повикот на меѓународната заедница и да ги објави податоците за целиот свет да може да види за кого гласал венецуелскиот народ и дека нивните демократски аспирации се исполнети”, рече Џон Кирби, портпарол на Белата куќа за национална безбедност.

Мадуро ги отфрли тврдењата на Гонзалес за победа, тврдејќи дека имало десничарски заговор за саботирање на неговата влада. Опозицијата, во меѓувреме, ја мобилизираше венецуелската дијаспора да протестира низ градовите ширум светот поради оспорувањето на изборните резултати.