Републиканскиот претседателски кандидат Доналд Трамп го префрли својот фокус на потпретседателката Камала Харис, неговата веројатна противничка во трката за претседателската функција, критикувајќи го нејзиното досие за имиграција.

„Таа сака сите да имаат амнестија. Потоа Џо Бајден ја направи главна за границата и тогаш навистина стана лошо. Таа започна илегална инвазија на вонземјани на нашата земја. Таа рече: „влезете“, се сеќавате?”, рече Трамп на митинг.

Илегалната имиграција е водечко прашање меѓу републиканските гласачи, а кампањата на Трамп се обидува да ја поврзе Харис со имиграциската политика на Бајден нарекувајќи ја негова „гранична царица“.

„Таа никогаш не била именувана за гранична царица. Всушност, границата воопшто не и беше приоритетно прашање”, вели Тереза Кардинал Браун од Двопартискиот центар за политики.

На почетокот на администрацијата на Бајден, на Харис и беше доделена задача да ја намали миграцијата до јужната граница на САД во соработка со централноамериканските нации Гватемала, Хондурас и Ел Салвадор.

„Таа беше задолжена за развој на стратегија и преземање обврски за развојна помош и инвестиции во тие три земји од Северниот триаголник за да помогне во намалувањето на таканаречените фактори на притисок за миграција.", вели Тереза Браун.

Откако Бајден побара од Харис да ја предводи стратегијата за да помогне во подобрувањето на животните услови и да ги обесхрабри мигрантите да го напуштат својот дом, пораката на Харис за имиграција стана построга.

„Сакам да им бидам јасна на луѓето во овој регион кои размислуваат за тоа опасно патување до границата САД и Мексико. Не доаѓајте”, рече Харис.

Трамп вели дека досието на Харис покажува дека таа е „ултра либерална“ во однос на имиграцијата.

„Камала гласаше за смртоносните градови за засолниште, ја поддржува декриминализацијата на нелегалните гранични премини и поддржува масовна амнестија за сите илегалци. Запомнете го тоа”, тврди Трамп.

Републиканците во Претставничкиот дом усвоија резолуција со која се осудува администрацијата на Бајден и неговата „гранична царица Камала Харис“ за необезбедување на границата.

Водечкиот демократ во Претставничкиот дом Хаким Џефрис вели дека републиканците лажат за Харис затоа што немаат план да се справат со предизвиците на границата.

„Потпретседателката не беше гранична царица. Тие го измислуваат тоа, затоа што немаат афирмативна агенда, визија или учинок за американскиот народ", Џефрис.

Адвокатот за имиграција Хектор Квирога вели дека е потребна имиграциска реформа, без разлика кој ќе биде избран за претседател.

„Имаме над три милиони предмети заглавени во судовите. Нема доволно судии за имиграција. Тоа го кажуваме долго време”, Квирога.

Администрацијата на Бајден вели дека бележи напредок на границата, известувајќи дека апсењата за илегални преминувања од Мексико во јуни биле најниски од кој било месец за време на претседателствувањето на Бајден.