Говорот што Џо Бајден ќе го одржи вечерва на Демократската национална конвенција во Чикаго, Илиноис нема да биде оној што претседателот првично го имаше на ум.
Сега тој мора да го преземе предизвикот да и` се обрати на партијата која, според сите проценки, покажа дека била подготвена да го испрати 81-годишниот претседател многу пред тој да биде подготвен да се повлече.
Партијата веднаш се раздвижи околу неговата помлада потпретседателка, речиси во моментот кога Бајден објави дека не бара реизбор, брзо менувајќи ги бројките за гласање за Демократската партија за помалку од еден месец.
Соочувањето со оваа реалност достинствено е тешко за секого.
Можеби е особено тешко за Бајден, кој е во политиката пет децении и се обидува да ја добие претседателската функција уште од неговото прво кандидирање за Белата куќа во 1988 година.
Во интервју за Ем-Ес-Ен-Би-Си неколку недели пред да се повлече, Бајден рече дека „многу се фрустрира“ од партиските елити.
„Некој од овие момци не мисли дека треба да се кандидирам? Кандидирај се против мене. Оди и најави се за претседател. Предизвикај ме на конвенцијата“, рече тој, видно иритиран.
Денес, Бајден ќе се соочи со „историски невидена ситуација“, рече Томас Шварц, претседателски историчар на Универзитетот Вандербилт.
„Тој е претседател со еден мандат, кој беше принуден да се повлече од лидерите на неговата партија - [поранешната претседателка на Претставничкиот дом] Пелоси, Обама, [претседателот на мнозинството во Сенатот] Шумер и [претседателот на Претставничкиот дом] Џефрис, сега побараа да даде ентузијастичко одобрување за неговиот потпретседател“, изјави Шварц за Гласот на Америка.
„Не е потребно Зигмунд Фројд да сфати дека Бајден може да има многу конфликтни чувства“.
Единствениот демократски претседател во модерното време кој се обиде и не успеа да заработи втор мандат беше Џими Картер, кој загуби од Роналд Реган во 1980 година.
Единствениот друг демократски претседател, кој првично побара реизбор, но се повлече од трката беше Линдон Џонсон во 1968 година, поради протестите против неговата политика за војна во Виетнам.
Демократите го почитуваат Бајден како великодушен лидер кој ја стави земјата пред своите политички амбиции. Со четири недели да ја прифати реалноста дека тој нема да биде на врвот на демократското гласачко ливче, тој се очекува да ја одигра својата улога во поддршката за Харис.
Во прегледот на она што може да се случи вечерва, минатиот четврток, за време на првото заедничко појавување на Бајден и Харис за промовирање на напорите на администрацијата да ги намали цените на лековите на рецепт, и двајцата лидери се пофалија и аплаудираа еден со друг.
Нивните говори беа прекинати со скандирањата од поддржувачите „Ви благодараме Џо“.
Бајден мора да покаже дека одлуката да не се кандидира за втор мандат е „донесена по негова волја“, рече Џенифер Лолес, професорка по политика на Универзитетот на Вирџинија.
Ова е клучно за да се поништат републиканските поенти да ја поткопаат Харис и да донесат поделба меѓу демократите дека тој бил „принуден“ и дека номинацијата му била „украдена“, изјави таа за Гласот на Америка.
Републиканскиот кандидат, поранешниот претседател Доналд Трамп предложи Бајден да организира изненадувачки настап на Демократската национална конвенција за да ја врати номинацијата.
„Какви се шансите да неискрениот Џо Бајден, најлошиот претседател во историјата на САД, чие претседателство неуставно му го украдоа Камабла, Барак Хусеин Обама, лудата Ненси Пелоси, Адам Шиф, расплаканиот Чак Шумер и други на лудачката левица, ја урне Демократската национална конвенција и се обиде да ја врати номинацијата, почнувајќи со мое предизвикување на друга дебата“, напиша Трамп во објава на социјалните мрежи, пишувајќи го погрешно името на Харис.
Малку е веројатно дека тоа ќе се случи. Наместо тоа, со поддршката за Харис, Бајден ќе има за цел да го истакне сопственото наследство - неговите домашни законодавни достигнувања, надворешнополитичкото досие и можеби неговата улога како лидер, кој во главите на демократите уште еднаш ја спаси земјата од Трамп, овој пат со пренесување на факелот.
„На многу начини, наследството на Бајден зависи од успехот на Харис колку и од законодавните достигнувања на Бајден“, рече Лолес.
„И успехот на Харис зависи од ентузијастичка и обединета партија. Така, нивните стимулации се усогласени - покажете го обединетиот фронт што постои“.
Запрашан од новинарите во петокот која е неговата порака до демократите, Бајден одговори едноставно: „Победете“.
