Состојбата со човековите права во Белорусија е катастрофална и само се влошува, изјави специјалната известувачка на Обединетите нации Анаис Марин.
„Режимот на белорускиот лидер Александар Лукашенко во Минск намерно го чисти граѓанското општество од неговите последни гласови кои не се согласуваат“, изјави таа пред Советот за човекови права на ОН.
„Ситуацијата останува катастрофална. За жал, таа продолжува да се влошува“.
Таа вели дека „владата на Белорусија го измени веќе рестриктивното законодавство кое има за цел да ги укине граѓанските слободи, што доведе до пораст на политички мотивираните гонења и казните“.
„Недостигот од одговорност за кршење на човековите права поттикнува клима на страв меѓу жртвите и нивните семејства“, рече Марин.
Во нејзиниот годишен извештај, таа вели дека повеќе од 1.500 лица сè уште се притворени поради политички мотивирани обвиненија, со дневен просек од 17 неосновани апсења од 2020 година.
„Имам добри причини да верувам дека затворските услови се намерно поостри за осудените врз политички мотивирани основи, ставајќи ги во казнените ќелии за ситни прекршувања на затворските правила“.
„Никој не одговараше во Белорусија за незаконското притворање на десетици илјади мирни демонстранти во 2020 година, ниту за насилството или тортурата на која многумина од нив беа изложени“, рече Марин.
„Оваа општа неказнивост и климата на страв што произлегува од тековната репресија, принудија стотици илјади Белоруси на егзил“.
Извор: Агенција Франс-прес
