Главната битка со пожарите денеска претпладне се води во општината Пехчево, каде вклучени хеликоптери, пожарникари, како и припадници на армијата. Пехчево и селото Негрево вчера беа во опасност да бидат зафатени од огнот, но тоа било успешно спречено. Денеска фокусот е ставен на пределот Буковик, каде пристапот е огранилен поради присуство на неексплодирани експлозивни средства.

Вкупно во државата денеска има петнаесетина пожари, и тоа кај Пехчево, Старо Нагоричане, Кратово, Куманово, Свети Николе, Македонски Брод, Пробиштип, Дојран, Пласница и Карбицни.
Од Центарот за управување со кризи најавија дека е обезбедена и меѓународна помош преку механизмот на ЕУ за цивилна заштита. Од Србија веќе пристигнал еден хеликоптер за гаснење, се очекува хеликоптери од Чешка, кој е со капацитет од три тона, како и два ер-трактора од Германија.

Директорот на ЦУК, Стојанче Ангелов рече дека состојбата со пожарите е сериозна, но не е алармантна и упати апел до граѓаните да не се собираат самоиницијативно за гаснење на пожарите.

„Како држава имаме доволно припадници на армијата, доволно припадници на полицијата. Ќе испратиме доволно војска и полиција кога градоначалниците ќе го побараат тоа. Граѓаните не секаде можат да бидат од корист и можат да ги попречуваат активностите на професионалните служби. Граѓаните можат да бидат корисни во одбрана на населените места“, рече Ангелов.