Над 44 илјади Палестинци се убиени во четиринаесетмесечните борби во Газа, според Министерството за здравство управувано од Хамас.

Бројката вклучува милитанти, но Хамас вели дека мнозинството од загинатите се цивили - вклучително и повеќе од 13 илјади деца.

Израелските напади опустошија цели населби. Обединетите нации соопштија дека 1,9 милиони луѓе во Газа - 90 отсто од населението - биле принудени да ги напуштат своите домови.

Агенциите за помош предупредуваат дека Палестинците во северниот дел на Газа се на работ на глад.

Во извештајот, „Амнести интернешенл“ рече дека постапките на Израел претставуваат геноцид.

„Овие злосторства беа и продолжуваат да бидат намерни дејства, калкулирани намерно за да доведат до уништување на Палестинците во Газа. Тие, исто така, се целосно неказнети. Заклучокот дека Израел врши геноцид е недвосмислен, заснован на докази“, вели Агнес Каламар, генерален секретар на „Амнести интернешенл“.

„Амнести“, исто така, го наведе јазикот што го користат некои израелски официјални лица - како што е министерот за национална безбедност Итамар Бен-Гвир, кој повика Газа да биде „уништена“.

„Најдовме изјави кои повикуваат на геноцидни акти и други злосторства според меѓународното право. Ги потврдивме видеата на војниците кои ги повторуваат тие наративи, повикувајќи на бришење на Газа или да се направи непогодна за живеење“, додава Каламар.

Израел силно негира дека извршил геноцид и рече дека извештајот на „Амнести“ е „целосно погрешен и заснован на лаги“.

Израелската војска вели дека борците на Хамас се кријат во училиштата и болниците, користејќи цивили како жив штит. Тврдењата е тешко да се проверат бидејќи Израел не дозволува странски новинари да влезат во Газа.

Израел, исто така, го обвинува Хамас дека извршил геноциден масакр во неговиот прекуграничен напад на 7 октомври минатата година, во кој загинаа повеќе од 1.200 луѓе.

Повеќе од 240 луѓе беа земени како заложници. Израелската влада тврди дека дејствува во самоодбрана во рамките на меѓународното право.

„Ние никогаш нема да се колебаме во нашата решителност да го браниме нашиот народ, да ја заштитиме нашата иднина и да ги вратиме сите наши заложници дома“, вели Дaни Данон, израелски амбасадор во ОН.

Прашањето е дали извештајот на „Амнести“ ќе има некакво влијание врз војната во Газа

„Постојат два центри на гравитација за оваа војна во Израел за Израелците. Една од нив е владата на САД и поддршката на американската влада. Другото е домашното јавно мислење и притисокот врз владата да го направи едното или другото во Газа. Мислам дека овој извештај нема да има влијание врз ниту еден од овие центри на гравитација“, посочува Андреас Криг од Кралскиот колеџ во Лондон.

„Амнести“ предупреди дека сојузниците на Израел - вклучително и САД - би можеле да бидат соучесници во наводниот геноцид и ги повика да престанат да снабдуваат оружје.