Потпретседателката Камала Харис го направи своето прво патување на границата меѓу САД и Мексико како демократска претседателска кандидатка на крајот од минатиот месец.

Таа помина покрај ѕидот изграден во Даглас, Аризона за време на администрацијата на Барак Обама. Подоцна, на предизборен митинг во Даглас, Харис рече дека земјата мора да ја контролира својата граница, но, таа, исто така, повика на подобар начин за легално процесирање на имигрантите.

„И затоа мораме да го реформираме нашиот имиграциски систем за да осигураме дека тој работи на уреден начин, дека е хуман и дека ја прави нашата земја посилна“, рече Харис.

Некои жители на Аризона велат дека имиграцијата е причина поради која гласаат за поранешниот претседател Доналд Трамп, кој вети дека ќе биде построг во однос на илегалната имиграција.

„Немам проблем со легалната имиграција. Воопшто не“, вели Џејн Дегрезиа, републикански гласач.

Но, Џејн Дегрезија вели дека оние кои илегално преминуваат не припаѓаат на САД.

„Многу е неправедно кон нашата земја. Тоа е опасно“, додава Дегрезиа.

Во Аризона има над 4,1 милион регистрирани гласачи. Околу 35% се регистрирани како републиканци, додека нешто повеќе од 29% се регистрирани како демократи. Околу 34 отсто од гласачите спаѓаат во категоријата „други“, која ги вклучува независните и оние кои не се усогласени со големите партии.

„Значи, бројот на независните меѓу избирачите во Аризона навистина расте“, вели Марк Кимбл, кој е претседавач со Комисијата за чисти избори за граѓани во Тусон, Аризона. И тој е регистриран како независен гласач. Тој вели дека имиграцијата не е најважното прашање за секого.

„Републиканците е многу поверојатно да кажат дека главното прашање е имиграцијата. Демократите е многу поверојатно да кажат дека главното прашање е абортусот. Независните имаат поголема веројатност да кажат абортус, но не во огромен број“, додава Кимбл.

Аризона е единствената одлучувачка сојузна држава што се граничи со Мексико и која се справи со рекорден број пристигнувања на мигранти во 2023 година.

На денот кога Харис ја посети границата, Трамп, во кампања во Мичиген, повторно вети дека ќе ја затвори границата.

„Ќе ја започнеме најголемата депортација во американската историја. И ние немаме друг избор освен да го направиме тоа“, рече Трамп.

Но, овој млад гласач вели дека би сакал да види имиграциски систем кој не ги одвојува семејствата толку долго.

„Жално е да се гледа како семејствата се разделуваат“, вели Даниел Гутиерез, гласач од Аризона.

Даниел Гутиерез вели дека неговиот татко е поддржувач на Трамп, додека неговата мајка вели дека ќе гласа за Харис. А за претстојните претседателски избори, Гутиерез одлучил да гласа за…
„Се одлучив за Демократската партија“.

Додека некои жители на Аризона знаат за кого ќе гласаат во ноември, други се повеќе фокусирани на едноставно привлекување повеќе луѓе на гласање.

Јосеф Гарсија е извршен директор на групата „Си Се Вота“.

„Какви и да се прашањата, сакаме тие да бидат информирани гласачи и да се одлучат. За нас, навистина зависи од нив како сакаат да гласаат“, вели Гарсија.

И овие гласачи би можеле да помогнат во одлуката кој ќе ја освои Белата куќа на 5-ти ноември.