На овие претседателски избори во САД има два милиона повеќе азиско-американски гласачи отколку кога Џо Бајден и Доналд Трамп првпат се соочија пред четири години, според Истражувачкиот центар Пју.

Тоа зголемување ги прави гласачка сила што може да ја направи разликата меѓу Бајден и Трамп во блиските изборни трки, вклучително и во сојузните држави Аризона, Џорџија и Невада, вели активистката Кристин Чен.

„Кога кампањите бараат дополнителни гласови бидејќи изборите се добиваат со мала разлика, тие навистина треба да го погледнат електоратот - азиски Американци. Затоа што во 2020 година, над 21% од нашиот електорат првпат гласаше. Значи, ние сме многу мотивирани“, вели Чен.

Што очекуваат мотивираните азиско-американски гласачи од претседателот? Гласот на Америка излезе и праша некои од нив.

„Јас барам добра енергија кај претседателот, да има добро размислување, да носи правилни одлуки, а не само да чека од персоналот околу него да го направи тоа“, вели Самнанг Хоеум, гласач.

„За мене не се важни годините. Се` додека можат да ја завршат работата и можат да им помогнат на сите граѓани да добијат подобри работни места, добра можност за бизнис, да се обидат да не` заштитат од војна. Тоа е главна работа за сите, верувам“, смета Хангканха ДеСалво, гласач.

„Би сакала да видам повеќе помлади луѓе на власт бидејќи имаат повеќе време, а особено имаат повеќе сила. Не е дека постарите немаат, но време е за нова генерација“, додава Софиа Оумрет, гласач.
Азиските Американци, жителите на Пацификот и домородните хавајски гласачи, се најмногу мотивирани од економската и надворешната политика, според анкетата на Асошиетед прес кон крајот на минатата година, при што приближно тројца од 10 кои велат дека нивните приоритети се инфлацијата и имиграцијата.

Азиско-американските гласачи беа фактор на конгресните избори во Пенсилванија пред две години, и се очекува да бидат во фокусот на двете кампањи во оваа сојузна држава, која може да се наклони на која било страна на претседателските избори во ноември.