Генералниот конзулат на Република Македонија во Њујорк за Гласот на Америка на македонски потврди дека во разорниот удар на ураганот Ајрин во сојузната држава Вермонт животот го загубила 20-годишна Македонка.
Таа престојувала привремено во САД преку програмата за студентска размена. Од Конзулатот наведуваат дека засега не го објавуваат идентитетот на загинатата поради заштита на личните податоци и приватноста на жртвата.
Девојката, која потекнува од Источна Македонија, била во САД на куса програма од 2-3 месеци. Конзулатот во Њујорк е во контакт со агенцијата надлежна за нејзиното работно место и здравствено осигурувањето за време на престој во САД. Во согласност со нејзините родители и соработка со агенцијата, транспортот на телото во Македонија ќе се организира во наредните неколку дена.
