Украина постигна „многу“ во својата офанзива во Курск во Русија, но тешко е да се каже како ќе се развива ситуацијата понатаму, изјави во четвртокот на новинарите во Осло генералниот секретар на НАТО Јенс Столтенберг.
„Само Украинците можат да ги направат тешките избори што се потребни, како на пример каде да ги распоредат своите сили и каков тип на војна е соодветен во оваа ситуација“, рече Столтенберг.
Руските сили напредуваат на истокот на Украина, додека украинските трупи извршија храбар упад во рускиот регион Курск, каде што на 6 август го започна најголемиот странски напад врз Русија од Втората светска војна.
Столтенберг рече дека Украина има право на самоодбрана, вклучително и со проектили со долг дострел што можат да стигнат до воени цели на руска територија.
„Мило ми е што многу земји од НАТО ја дадоа таа можност, а оние кои сè уште имаат ограничувања ги ублажија ограничувањата за Украина да може да се брани“, рече Столтенберг.
Украинскиот претседател Володимир Зеленски в петок ќе присуствува на состанокот на коалицијата на нации кои испорачуваат оружје на Украина, каде што се очекува да побара зголемена испорака на оружје, особено ракети со долг дострел, пишува германскиот магазин Шпигел.
Зеленски ги повика сојузниците да помогнат со противвоздушната одбрана и да ги отстранат ограничувањата што го спречуваат Киев да користи донирано оружје за далечни напади во Русија.
Столтенберг претходно на конференција изјави дека не гледа непосредна воена закана против земјите на НАТО, но рече дека постои постојана опасност од тероризам, сајбернапади и саботажа.
