Во изминатата година, речиси 6.000 ученици имигранти се запишале во јавните и приватни училишта во Колорадо, според државните власти. На академијата Колорадо Херитиџ Хајтс во Денвер, повеќе од една третина од учениците се имигранти. Наталија Милер-Форест е една од нив.

„Секој нов имигрант, без разлика дали е илегален имигрант, има зелена карта или пак е натурализиран граѓанин, секое дете во Америка има право на бесплатно образование”, вели Наталија Милер-Форес, директорка на академијата во Колорадо Херитиџ Хајтс.

Нејзиното училиште добива дополнителни средства од сојузната држава за да помогне да се прилагоди на предизвиците на променливата училиштна средина. Овде се претставени 23 држави, вклучувајќи го и Судан и ученикот Фарук Адам.

„Мојот најдобар другар е од Етиопија, а потоа дознав дека Етиопија и мојата земја Судан имаат многу заеднички работи. Она што ми се допаѓа во Америка е демократскиот систем, тоа што можеме да бидеме слободни, има слобода на говор и слобода на вероисповед”, вели ученикот Фарук Адам.

Сојана Хабтамо е од Етиопија.

„Сметам дека е важно да запознавате луѓе од други земји бидејќи е убаво да имате знаења за различни места каде што не можете едноставно да отидете во светот без да знаете ништо за тие места, па затоа е добро да ги разберете гледиштата на луѓето и сè останато“, изјави ученичката Сојана Хабтамо.

Украинката Ирина Шаталов вели дека многу родители имигранти се загрижени дека нивните деца ќе бидат оценети лошо затоа што не зборуваат англиски јазик.

„Ова училиште има многу новодојдени имигранти со различно потекло и сите деца си играат заедно”, вели родителката Ирина Шаталов.

Со наставници од Источна Европа, Индија и Африка, директорката Милер-Форест работи на создавање удобни услови за сите нејзини ученици и е горда на тоа како американските деца им помагаат на соучениците од други земји.

Ученичката Рејчел Вашингтон вели дека имигрантите го подобруваат академското искуство во училиштето.

„Неколку од моите пријатели се имигранти. Некои од нив се исто така од различни држави. Имам другарка од Мексико. Таа ме научи неколку шпански зборови”, изјави ученичката Рејчел Вашингтон.

Новодојдените ученици значат дополнителни трошоци. Едукаторите велат дека дополнителните државни средства за оваа учебна година можеби ќе треба повторно да се зголемат следната година, бидејќи училиштата во Денвер минатиот месец објавија повеќе од 90 отсто зголемување на запишувањето во однос на овој период минатата година.