Политичката пресвртница која ја донесоа претседателските и парламентарните избори кои се одржаа во април и мај ја одбележаа 2024 година во Северна Македонија. СДСМ и ДУИ заминаа во опозиција а ВМРО – ДПМНЕ заедно со два нови играчи на политичката сцена – коалицијата „Вреди“ и партијата „ЗНАМ“ сега ја водат државата.

На меѓународен план никакво поместување, државата останува во европската чекална. Живејачката во Северна Македонија е сè поскапа а приходите на граѓаните се далеку од трошоците кои треба да ги покријат во тековниот месец. Криминалот и корупцијата се македонското секојдневие, а довербата во институциите паѓа од ден во ден.

Ново мнозинство во Парламентот

ВМРО – ДПМНЕ буквално ја прегази СДСМ на претседателските и парламентарните избори и во моментов со 78 пратеници има исклучително стабилно мнозинство на кое нема кој да му парира на политичката сцена во државата. Во сега опозициската СДСМ, лидерот Димитар Ковачевски ја понесе одговорноста и си замина а го наследи Филипче кој треба да ја консолидира партијата којашто е во слободен пад.

Изборите на површина извадија два нови политички чинители во државата. „ЗНАМ“ предводена од кумановскиот градоначалник Максим Димитриевски, кој ги собра околу себе незадоволните членови и симпатизери на СДСМ а Договорот за учество во владејачката коалиција беше постигнат брзо и лесно.

Подем на „Вреди“

Во албанскиот политички блок се појави коалицијата „Вреди“ составена од четири партии и исто толку лидери многу брзо зеде замав меѓу граѓаните. Предводена од искусен политичар како Изет Меџити зад кого стоеја Касами, Таравари и Гаши успеа да ги детронизира ривалите од Мала Речица. Гаши стана спикер а Меџити прв вицепремиер. Иако дел од програмата беа уставни измени до крајот на годинава, сепак мораа да ретерираат поради цврстиот став на коалицискиот партнер.

По две декади минати во фотелјите низ институциите на државата ДУИ сега седна на столчињата наменети за опозицијата. Како опозиција секојдневно се обидуваат да извадат глас повеќе користејќи го вечниот џокер национализмот и правата на Албанците во Македонија но во моментот фокусот им е на регулирање на штетата откако високи партиски функционери се осомничени за криминал и корупција.

Артан Груби на „Црната листа“ на САД

„Црната листа“ на САД и во 2024 година продолжи да се дополнува. По Катица Јанева и Стевчо Јакимовски на неа е најде Артан Груби, десната рака на Али Ахмети и судијата Енвер Беџети, кадар на ДУИ.

Груби е во бегство и се бара со меѓународна потерница поради милионски криминал во државната лотарија а ДУИ јавно се дистанцираше од него во обид да го спаси својот рејтинг.
Судството и довербата во него и годинава остана еден од клучните проблеми. Рејтингот од два проценти е адутот на премиерот Мицкоски кој бара распуштање на Судскиот совет кое е извесно дека ќе се случи откако Собранието донесе негативен извештај за новото работење. Изборот а потоа и разрешувањето на претседателката на Судски совет Весна Дамева, како и апсењето на врховниот судија Наќе Ѓоргиев само го потврдија хаосот во судската власт.

Галопирачки цени

На економски план без значаен напредок во 2024 година. Замрзнати цени и маржи, владини мерки, кошници и акции се начините на кои државата се обидува да ги заузди цените кои ги диктираат трговците во трка за поголем профит.

Кошниците и како акција и како мерка на два пати беа изиграни токму од трговците а граѓаните останаа да го плаќаат цехот. Минималната синдикална кошница за една година стана потешка за околу осум илјади денари и сега изнесува 62 илјади денари а платите продолжуваат да каскаат далеку зад цените. Минималната плата од 450 евра остана само желба на Синдикатите.
Бизнисот и општините сè уште се во исчекување на 500-те милиони евра од унгарскиот кредит со кои државата неколку месеци располага но бара начин да ги пласира.

И натаму во чекалницата на ЕУ

Северна Македонија остана во чекалницата на ЕУ, се раздвоија патиштата со Албанија. Измени на Уставот и внесува на Бугарите останува единствениот услов за продолжување на преговорите, а Владата останува на својот ригиден став дека – единствено можно со одложено дејство и се обидува со своите аргументи да издејствува позиција кај меѓународниот фактор. Граѓаните од ден во ден се повеќе разочарани од Унијата.

Радмила Шеќеринска е избрана за заменик генерален секретар на најмоќната алијанса во светот – НАТО а „летечкиот Македонец“ Игор Стефановски – Иџе по трет пат ја освои европската круна во ридско брзинските трки.

Граѓаните остануваат со надеж дека наредната 2025 година ќе им донесе просперитет а на Владата и останува обврската за борба со корупцијата и криминалот но и за одглавување на процесот на евроинтеграции.