Во Чикаго, Илиноис, предградие на Бриџвју, познато и како „Мала Палестина“, им се служат производи од арапско кафе на палестинските Американци во локална продавница.

„Каде и да одите во оваа област, гледате луѓе кои се муслимани“, вели Диана Отман, жителка на Илиноис.

Отман предава во локалното исламско училиште и често ја посетува продавницата. Најважното прашање за Отман оваа изборна година е завршување на војната меѓу Израел и Хамас, терористичка група означена од САД.

Војната започна со нападот на Хамас врз Израел минатата година, во кој загинаа 1.200 луѓе и беа киднапирани 250 лица. Во израелската контраофанзива загинаа повеќе од 41.000 Палестинци, голем број што Израел вели дека вклучува илјадници милитанти.

„За да го добијат мојот глас, ќе морам да видам посветеност за итно ставање крај на геноцидот“, додава Отман.

Многумина во „Мала Палестина“ ја делат загриженоста на Отман.

Округот Кук, Илиноис - што ги опфаќа Чикаго и Бриџвју - ја има најголемата палестинска заедница во државата. Илиноис е дом на околу 475.000 муслимански Американци, околу 3,7 отсто од вкупното население.

„Тие сочинуваат значително малцинство во Илиноис и имаат тенденција да гласаат за демократи“, вели Табита Бонила, професорка по социјална политика.
Таа додава:
„Малку е веројатно дека во Илиноис тие ќе променат избори, но во држава како Мичиген се проценува дека се околу 200.000 муслимански Американци кои гласаат. И само за споредба, јазот меѓу републиканците и демократите на последните избори беше 150.000 луѓе. Ако сите 200.000 муслимански Американци решат да не гласаат или да не гласаат за демократ, тоа навистина би можело да направи разлика во одлучувачка држава како Мичиген“.

„Тие се луѓе во Мичиген кои од прва рака го знаат влијанието на бомбите финансирани од Америка“, смета Лејла Елабед, која е политички организатор на заедницата во Мичиген и сестра на конгресменката Рашида Тлаиб, Американка со палестинско потекло.
„Сакаме да го смениме курсот на актуелната политика и да усвоиме политика која ќе спаси палестински животи и ќе стави крај на окупацијата на Палестинците“, додава таа.

„Муслиманската заедница не само во Мичиген, туку и во речиси секоја држава, е поактивна, поинволвирана од кога било досега“, вели Кит Елисон, актуелен главен правобранител на Минесота и беше еден од првите членови на Конгресот на САД со муслиманско потекло.
Муслиманско-американската заедница има посилни политички мускули отколку што имала досега, и е гласна.
Диана Отман вели дека сака да има други опции на гласачкото ливче.

„Чувствувам дека мнозинството од луѓето во оваа област не сакаат да гласаат за демократи или републиканци“, вели Отман.
Советот за американско-исламски односи проценува дека повеќе од 2,2 милиони муслимански Американци се регистрирани да гласаат во САД оваа изборна година. Се вели дека тоа претставува зголемување за повеќе од еден милион од конгресните избори пред две години.