Армијата на САД соопшти дека мали беспилотни летала се забележани како редовно летаат над четири американски бази во Британија од 20 ноември. Базите го вклучуваат Лејкенхит, дом на 48-то борбено крило на Военото воздухопловство на САД, камен-темелник на неговата борбена способност во Европа.

Пентагон соопшти дека сериозно ги сфаќа инцидентите.

„Утврдивме дека ниту еден од овие упади не влијае на објектите или средствата што ги имаме во тие бази“, вели Генерал мајор Патрик Рајдер, портпарол на Пентагон.

Британија распореди околу 60 војници околу базите. Министерката за одбрана на Британија Марија Игл рече дека користат „повеќеслојни мерки за заштита на силите“.

„Ќе осигуриме секој што ќе го фатиме за вакво однесување да ја почувствува силата на законот“, нагласи Игл.

Војската на САД соопшти дека прелетите на беспилотните летала „варираат во големини и конфигурации“. Тоа веројатно укажува на намерна акција, вели експертот за безбедност од дронови, Дејвид Дан.

„Најочигледно е дека ова се практики со цел да го принудат аеродромот да работи на поинаков начин или да ги прекине воздушните операции“, вели Дан.

Дан додава дека американските непријатели би можеле да ги користат беспилотните летала за други цели - како што е собирање разузнавачки информации за бројот на борбени авиони и каде се сместени.

Беспилотните летала се забележани и над станбените згради на американскиот воен персонал.

„Најранливиот дел се пилотите. Ако можете да идентификувате каде живеат, следејќи ги дома во нивните домови, можете да идентификувате каде можете да го прекинете најслабиот дел од тој синџир“, објаснува експертот Дан.

Лондонскиот Тајмс пишува дека властите не ја отфрлиле Русија како виновник. Дан вели дека има докази дека Москва сака да ги засили хибридните напади, што значи невоена форма на војување што сè уште може да биде деструктивно.

„Без разлика дали станува збор за прекин на подморските кабли, или за запаливи пакети кои се испраќаат во градот во кој живеам, Бирмингем - на аеродромот во Бирмингем беше пронајдена запалива направа. Овие работи обично се прават од трета страна, при што се чини дека руската држава врбува криминалци во Велика Британија“, посочува Дан.

Руската амбасада во Лондон не одговори на барањата на Гласот на Америка за коментар. Москва претходно негираше каква било вмешаност во хибридни напади врз Западот.