Гласниот критичар на Кина, сенаторот од Флорида, Марко Рубио, предложи закон за ревитализација на индустриската политика на САД и намалување на зависноста од увоз од Кина. Тој, исто така, го поддржува отповикувањето на трговските предности доделени на Кина, позиција што ја бранеше уште во 2022 година.

„Ние не направивме ништо додека повеќе од две децении Кина методично ја поткопуваше нашата економска сила крадејќи ја нашата критична технологија, нашиот производствен капацитет, нашите работни места. Ние не направивме ништо додека тие ја уништија нашата социјална кохезија со намамување на тие работни места”, истакна Рубио.

Сега позициониран да стане следниот врвен американски дипломат, Рубио се залага за зајакнување на глобалните партнери против, како што вели, растечката економска и воена агресија на Кина.

„Кина сега го следи економскиот империјализам, заробувајќи го светот во развој преку експлоатирачките заеми на иницијативата „Појас и пат“. Тие сега се неизбежен агресор на нашите сојузници и нашите партнери во места како Тајван, Јапонија, Индија и на други места”, посочи Рубио.

Како лидер на двопартиската Конгресно-извршна комисија за Кина, Рубио ги поддржа продемократските движења во Хонг Конг. Тој подоцна беше санкциониран од владата во Пекинг за, како што рече Кина, негова вмешаност во „прашања поврзани со Хонг Конг“.

Рубио, исто така, се заложи да се забрани увозот поврзан со принудна работа во Ксинџијанг и да се прошират санкциите за одговорните за кршење на човековите права на Ујгурите.