Глас на Америка: Господине Ковачки, учествувате на Трансатлантскиот форум со претставници од собраниски делегации од земјите на НАТО во Вашингтон. Каде е фокусот со оглед на растечките глобални закани?

Ковачки: Учествуваме со повеќепартиска делегација на Собранието. Фокусот е на глобалните растечки закани. Тука станува пред се збор за бруталната агресија на Русија врз Украина, за хибридните закани, за заканите кои што доаѓаат со нелегалната миграција за заканите од авторитарните лидери.

Глас на Америка: Меѓутоа, присуствувавте ѝ на парламентарното собрание на НАТО на Годишната сесија, чиј домаќин беше Парламентот на Канада во Монтреал, со уште 260 пратеници од 32-членки на НАТО Алијанса. Дали беше повторен ставот за непоколебливата поддршка кон Украина или има најави за премореност и промена на ставот на Алијансата, со оглед дека и новоизбраниот претседател Доналд Трамп најави можност за брзо ставање крај на војната во Украина, иако, не објасни, како?

Ковачки: Не, нема премореност. Украина како нападната држава и членка на ОН има апсолутно право да се брани согласно членов 51 од Повелбата на ОН и има право на самоодбрана. Може да побара и помош од други држави. Многу членки на НАТО и даваат поддршка, на хуманитарен план, и на воен план. И Македонија помага хуманитарно и воено. Јас сум горд што го постигнавме лимитот од 2 отсто од бруто домашниот производ за одбраната од Самитот на Велс во НАТО и се надавам дека тој процент ќе расте со што ќе може да се модернизира македонската армија.

Глас на Америка: Со изборот на Радмила Шекеринска за втор човек на НАТО, Алијансата јасно и отворено манифестира свест и посветеноста за важноста на регионот. Каде може Македонија да се наметне во поактивна улога во решавање на акутните безбедносни предизвици?

Ковачки: Македонија како една од најнови членки, по неа влегоа Шведска и Финска и тоа со наша поддршка, е фактор којшто влијае и на носењето на одлуките. Седиме на иста маса и носиме одлуки заедно со останатите членки. Мора да се напомене дека Балканот не смее да остане црна дупка и да бидеме неинтегрирани.

Глас на Америка: „Имаме црвена линија, толку можевме да направиме, повеќе не можеме“ – тоа беше одговорот на премиерот Мицкоски на прашањето што Владата мисли да преземе по изјавите од новата евркомесарка за проширување, Марта Кос, дека Брисел очекува Северна Македонија да ги заврши преземените обврски во делот на уставните измени. Колку ваквите изјави може да помогнат за откочување на процесот со ЕУ? Потребно ли е национално единство и усогласување на националните интереси за вакво битно прашање, како што е членство во ЕУ?

Ковачки: Стратешки е неодговорно Македонија да биде држава надвор од евроинтегративниот процес. Македонија треба да биде дел од ЕУ, но тоа не треба да биде под никаков диктат и уцени. Треба да бидеме примени достоинствено на еден начин на кој што доликува на една цивилизирана држава. Бугарија има предлог на маса, а тоа е одложена примена на уставните измени. Доколку сака Бугарија тие измени да се случат, таа сама може на Македонија да ѝ помогне што побрзо. Наместо Бугарија да биде блокатор може да биде катализатор на нашиот евро-интегративен пат. Очекувам разум и кај нашите источни соседи и им посакувам што побрзо да формираат влада.

Глас на Америка: На внатрешно-политички план, корупцијата е едно од најголемите предизвици за Македонија, со претходната власт, но и предизвик за новата Влада. Еве, и заменик-помошник државниот секретар на САД за Западен Балкан, Александeр Касаноф, без претходни најави, се сретна со владиниот врв во Скопје, јасно кажа дека поддршката на САД за Македонија продолжува, особено во делот на борбата против корупцијата, и дека тоа Вашингтон многу сериозно го сфаќа. Низа имиња се разгледуваат и се дополнети на американската „црна листа“ со Артан Груби и Енвер Беџети - потврди амбасадорката на САД во Скопје Агелер. Со оглед дека сте пратеник од владејачката партија, а очекувањата се големи од јавноста, по изборите, што - се презема?

Ковачки: Политичка волја кај нас постои и тоа сме го демонстрирале и за време на предизборната кампања и денес истото го говориме. Делата и акциите треба да бидат тие што ќе говорат, а не зборовите. За тоа се потребни обвинители. Тие обвинители треба да ја извадат Македонија од листата за перцепција и да биде повисоко рангирана од африканските држави. Имаме само 10 отсто спроведување од стратегијата за борба против корупцијата. Затоа, на Македонија и треба една сериозна акција. Ова не е притисок но ги повикувам обвинителите сериозно да се зафатат за својата работа и да стават луѓе зад решетки. Тоа го очекува народот. Она што го гледаме со ставање на црната листа на одредени бивши владини лица како Артан Груби, уште еднаш покажува дека тоа што зборувавме во минатото уште еднаш е точно. Обвинителството не треба да спие. Треба да видиме лица со лисици на рацете.

Глас на Америка: Повиците од САД, стратешкиот партнер на Македонија, се дека борбата против корупцијата мора да се интензивира и дека американската администрација продолжува со поддршката. Како ја оценувате досегашната соработка на ова поле со официјален Вашингтон, каде можат, САД да помогнат?

Ковачки: САД ѝ помагаат на Македонија и во обука и со финансиски проекти имаат вложено многу во државата. Во делот на борбата против корупцијата исклучително го цениме тоа што го прават со ставањето на одредени лица на црната листа затоа што ни кажуваат дека нашите институции дома не функционираат. Конечно, тие институции треба да профункционираат. Обвинителите не треба да чекаат некој да биде ставен на црна листа за да реагираат.