Центарот за современи уметности од Скопје дизајнираше Кукла робот кој ги предупредува граѓаните за лажни вести. Оваа уметничка акција која се реализира во рамките на проектот „Со уметност против лажни вести“, ја потенцира важноста на темата за тоа како дезинформациите влијаат врз ставовите и перцепциите на јавноста.

Интерактивната инсталација е изработена во соработка со младиот уметник Озбек Ајваз и истата се состои од кукла која има вградени интерактивни сензори и звучници преку кои куклата ја раскажува приказната како граѓаните да се заштитат од лажните вести и како да ги препознаат лажните и вистинските вести и информации.

Инсталацијата во наредниот период ќе биде поставена на повеќе фреквентни локации во Скопје, каде минувачите ќе имаат можност за кратка интеракција со куклата робот.