Оваа композиција од повеќе од сто илјади разнобојни домино плочки се сруши во рок од осум минути, но беа потребни повеќе од 10 дена за да се изгради.

Овој уметнички проект беше претставен во Националниот музеј за градежништво во Вашингтон од Лили Хевиш, позната американска уметница која прави домино инсталации. Таа создава сложени дизајни, а потоа ги урива со еден прст.
„Имаме работи како што се столбовите. Имаме голем заштитен ѕид на Мона Лиза. Имаме џиновска централна спирала што ќе оди наоколу и многу други интересни типови на движења и ефекти“, вели Хевиш, која поставила и светски рекорд за највисока домино структура, висока 10-метри.

„Ги поставувавме плочките на 10 метри височина. Висевме на жици, и беше малку несигурно на врвот од кулата, но за среќа успеавме да ги одржиме и постигнавме светски рекорд“, објаснува Хевиш.

Хевиш не го направи тоа сама. Ѝ помагаше меѓународен тим од девет мајстори на домино уметност. Еден од нив е 24-годишниот Алекс Хуанг, кој почнал да се занимава со домино кога имал 12 години и вели дека е воодушевен што е дел од проектот.

„Навистина е возбудливо да се направи тоа во Националниот музеј за градежништво. Лили ни кажуваше цела недела дека треба да ги зголемиме нашите проекти. Тоа е толку голема просторија. Ќе има илјадници луѓе овде. Заедно го направивме тоа со Лили, таа знае како да приреди шоу“, вели Хуанг.

Во својата работа, 25-годишната Хевиш ги комбинирала физиката, математиката, инженерството и уметноста. Нејзината страст започнала во раното детство.

„Моите баба и дедо имаа домино со точки, а кога имав девет години сама почнав да ги редам и да ги рушам плочките за забава. Со текот на времето, почнав да објавувам на Јутуб, каде што најдов многу луѓе кои создаваат неверојатни домино проекти“, објаснува Хевиш.

На нејзиниот канал на Јутуб – Хевиш 5, таа има повеќе од четири милиони претплатници и над 1,8 милијарди прегледи.

Претседателката на Националниот музеј во Вашингтон, Ајлин Фукс, вели дека решила да ја покани Хевиш по предлог на нејзините деца, кои се големи обожаватели на домино.

„Сите ние сме за градење и дизајнирање на подобар свет и за инспирација на луѓето да размислуваат за изградениот свет околу нив. Таа љубопитност... ...кога градите со домино, ја користите вашата креативност, вашата иновација, вашата наука, вашата математика, вашата уметност“, вели Фукс.

Освен што создава импресивни структури, Хевиш спроведува и работилници за деца. Програмата вклучуваше и прикажување на документарниот филм „Лили го соборува светот“, во кој се зборува како е да се биде една од единствените високо ценети женски уметници во светот на домино.