Демократи или републиканци: Каква американска политика може да очекува Северна Македонија после изборите во САД?

Во последните 20 години, американската политика кон Северна Македонија е константна, и кога републиканците беа на власт и сега со демократите, односот е ист, вели Емил Кирјас, поранешен државен секретар во Министерството за надворешни работи. Тој не очекува дека ќе има драстични промени со доаѓањето и на идната адмнистрација во Белата куќа.

„Македонија останува стратешки партнер, Македонија има важна улога на балканскиот полуостров и е важно за САД, Македонија да задржи прозападна и проатланска ориентација“, вели Кирјас.

И за поранешниот амбасадор во НАТО, Нано Ружин, победата на претседателските избори, на кој и да било од двајцата кандидати нема да промени многу во односот кон земјата.

„Сигурно е дека многу работи нема да се сменат во однос на Западен Балкан и Северна Македонија, бидејки знаеме дека американските надворешни политички ориентации се јасни, стабилни и нема промена од еден до друг правец. Едноставно нашето партнерство со САД ќе продолжи било кој од двајцата кандидати да победи“, вели Ружин.

На прашањето, која политика и е поблиска на Северна Македонија, онаа на републиканците или на демократите,еве што велат тие.

„Со победата или на Демократите или на Трамп на Републиканците, нема да има големи промени во нашиот балкански микрокосмпос. Само знаеме дека ако стане Трамп, за него Америка пред се е главен фокус, едем мал изолационизам. Доколку Харис дојде на власт, тоа значи дека би имало продолжување на политиката кон ЕУ и кон војната во Украина, а сите очекуваат одредени промени во политиката кон Блискиот исток“, посочува Ружин.

„Ако се гледа генералната политика на поставеност и начинот на говор, начинот на политика која се предлага и начинот на однесување на меѓународната сцена, за Македонија секако би било подобро Камала Харис да биде во Белата куќа, што незначи дека доколку Трамп биде повторно избран на овие избори, дека за Македонија нема да настанат добри моменти, зависоно од се како ќе се воспостават глобалните текови. Но тоа е ризик“, вели Кирјас.

Го прашавме Кирјас зошто смета така.

„Пристапот на поранешниот претседател Трамп е сосема различен. Неговиот пристап е народски кажано 'Сила Бога не моли'. Во таква консталација за Македонија тоа е лоша порака. Затоа што како мала земја, не е геостратешки важна, во опкружување каде соседите се поважен партнер на САД. Во такви услови за Македонија е многу лошо да се воспостави политика на победа на посилниот, а не на правото“, додава Кирјас.

Изборите во САД се закажани за 5-ти ноември.