Демократскиот конгресмен од Мериленд Џејми Раскин, по руската инвазија на Украина, е активен застапник за Украина и за обезбедување финансиска и политичка помош.
Гласот на Америка разговараше со законодавецот за последните санкции против Русија, времето и сценаријата за разгледување на помошта за Украина од Конгресот, како и за изгледите за членство на Украина во НАТО.
Глас на Америка: Моето прво прашање е за новите американски санкции против Русија. Дали мислите дека тие ќе бидат ефективни со оглед на тоа што претходните неколку рунди санкции го немаа посакуваниот ефект?
Раскин: Се надевам дека ќе работат и ќе ја покажат посветеноста на Америка да му помогне на народот на Украина. Се надевам дека ќе ја обединат Америка против војната на Путин. Мислам дека нема да го принудат Путин да ги повлече своите трупи од Украина или да престане да ги жртвува руските војници - се чини дека е целосно нечувствителен да ги испрати во смрт. Тој најде начин да го компензира шокот од американските санкции и очигледно соработува со автократии и тирански режими ширум светот, вклучувајќи ги Иран, Кина и Северна Кореја. Никој не очекува (воведувањето санкции) да биде одлучувачки фактор што ќе влијае на шансите на Украина во оваа војна. Но, се надевам дека тоа ќе ги поттикне Американците и колегите во Конгресот да ја разберат фундаменталната важност на предизвиците со кои се соочуваме.
Глас на Америка: Ако зборуваме за обединување и кохезија, особено во Конгресот, имате ли план Б доколку републиканците во Претставничкиот дом решат да го блокираат нацрт-законот за меѓународна помош усвоен во Сенатот?
Раскин: Не постои план Б, само план А. Едноставно е несфатливо да му свртиме грб на народот на Украина, кој се соочи со ослабувачката агресија на Путин и покажа неверојатен хероизам и храброст во борбата за демократија не само во нивната земја, но и во сите земји од регионот во одбрана на демократските институции и човековите права од автократските режими. Верувам дека немаме право да разгледуваме алтернативни сценарија. Знам дека европските земји значително ја зголемуваат поддршката и дека прават значителни инвестиции, дека земјите од НАТО ја покажуваат својата поддршка за поразот на Путин. Но, ние треба да размислуваме не само за европските земји кои стојат сами против фашистичката моќ, како онаа на Владимир Путин. Сакам да размислувам за Америка, која ќе биде таму во истата битка. Како што знаете, немаме војници во Украина. Се` што носиме се наши ресурси, зборуваме за 5-10% од годишниот буџет за одбрана. Ова е за заштита на човековите права, нашиот народ и сојузниците на САД. Украина е демократски сојузник на кој му е потребна нашата помош и не можам да ја разберам логиката на повлекување на поддршката среде битка.
Глас на Америка: Зборувајќи за стратегијата на САД кон Украина, имаше изјави дека „САД ќе ја поддржуваат Украина до крај“ и „се` додека можеме“. Сега стратегијата на САД кон Украина е да се преживее или да се победи во војната? Дали воопшто постои стратегија?
Раскин: Знам дека првично нашата поддршка за Украина беше во однос на политичката реторика и се надевам дека политичката волја беше да ѝ помогнеме на Украина да победи во војната. Точно се сеќавам на моментот кога почна и луѓето велеа дека Украина нема да преживее ниту 48 часа, а претседателот Зеленски ќе се качи во авион и ќе ја напушти земјата. Но, се разбира, Зеленски не одеше никаде, Украинците беа обединети за борбата, а моите колеги беа речиси целосно едногласни во верувањето дека мора да ја поддржиме Украина да победи во војната и да го одбрани нејзиниот национален суверенитет. САД не се заинтересирани за поделба на Украина, нас не нè интересира компромис кој ќе произлезе од преговорите со Русија, во кои таа ќе навлегува во градовите во Украина. Сакаме Украина да победи во оваа војна и потоа да преговара за мировен договор за условите на националната безбедност на Украинците и за поддршка на нивната демократија. Америка мора да биде целосно посветена на победата на Украина над Путин. Во спротивно, ќе ја добиеме тиранијата на Путин кон Европа, а резултатот ќе заврши со испраќање не милијарди долари на нашите сојузници, туку трилиони долари за да го спречи да ја проголта не само Украина, туку и да ги нападне Полска, Естонија и другите земји кои, како што вели, „припаѓаат на Руската империја“. Не заборавајте: Владимир Путин, шеф на КГБ, рече дека распадот на Советскиот Сојуз е најголемата трагедија и катастрофа на 20. век. Гледаме дека тој заговара заживување на Руската империја со неговиот диктаторски режим на чело. Мислам дека американскиот Конгрес треба да разбере дека треба целосно да ја поддржиме победата на Украина во оваа војна. Ова значи испраќање силен сигнал до светот дека не одиме никаде. Ќе бидеме со народот на Украина. Разбирам дека незадоволството расте во Русија и покрај обидите на Путин да ги потисне вестите за тоа што се случува. Верувам дека победата на Украина ќе биде почеток кога ќе можеме да кажеме дека Путин мора да ја прекине својата империјална агресија. Ние, другите народи и демократии во Европа, мора да го поддржиме НАТО во овој процес - тоа е многу успешен сојуз и воено партнерство против оние кои се обидуваат да го уништат суверенитетот на другите народи.
Глас на Америка: Пред неколку недели, американската амбасадорка во НАТО Џулијан Смит изјави дека не гледа сценарио во кое Украина ќе добие покана за членство во НАТО за време на јулскиот самит во Вашингтон. Што мислите, каква порака испраќа ова до американските партнери и ривали?
Раскин: Повеќето членови на Демократската партија веруваат дека одбраната на Украина е клучна за зачувување на демократијата и слободата во Европа и во целиот свет. Многу автократии внимателно набљудуваат дали Путин може да се извлече од тоа преку неговата итрина и жртвата на татковците и синовите. Знаеме дека Кина и Иран и цела лига автократии ширум светот гледаат да видат дали демократските народи можат да покажат издржливост и подготвеност да се борат за нашите демократски вредности. Верувам дека Путин го искористи можното членство на Украина во НАТО алијансата како оправдување за неговата инвазија и убиства на огромен број цивили, киднапирања на деца и многу други злосторства врз цивили. Дали Украина ќе биде дел од НАТО или не? Таа е веќе дел од демократскиот цивилизиран свет, кој мора да го заштитиме. Ова е прашање за народот на Украина, тие мора да најдат одговор, дополнително, ова е прашање за земјите-членки на алијансата. Главната работа за мене е да се погрижам Конгресот да ја прошири помошта за Украина и да одвои 60 милијарди долари, од кои најголемиот дел се планира да се потроши на американското воено производство и американските работни места за американската трговија и економијата што го произведува ова оружје за испраќање во Украина. Но, за идните безбедносни мерки за да се осигура дека тоа никогаш повеќе нема да се случи, мислам дека ќе има отворена дискусија во однос на Украина и НАТО. Владимир Путин јасно докажа дека е подготвен да започне војна против други земји, па затоа безбедносните мерки се нешто на што треба да се работи.