Генералниот секретар на НАТО Јенс Столтенберг денес ги отфрли стравувањата дека реизборот на поранешниот американски претседател Доналд Трамп ќе ја ослабне одбранбената алијанса, како што таа работи на обезбедување силна поддршка за Украина.
Столтенберг рече дека не мисли оти второто претседателство на Трамп ќе го загрози членството на САД во НАТО.
„Верувам дека САД ќе продолжат да бидат цврст сојузник во НАТО, без оглед на исходот од изборите во САД, бидејќи тоа е во интерес на САД“, рече тој во интервју за Си-Ен-Ен.
Републиканецот Трамп, жесток критичар на НАТО кога беше претседател, постојано се закануваше дека ќе се повлече од алијансата.
Тој го намали финансирањето на одбраната на НАТО и често се жали дека САД плаќаат повеќе од својот удел.
„Работев со него четири години и внимателно слушав, бидејќи главната критика беше за тоа што сојузниците од НАТО трошат премалку за НАТО“, рече Столтенберг.
Столтенберг, кој ги притиска земјите-членки да ги зголемат трошоците за одбрана, рече дека повеќе од сојузниците го зголемуваат својот воен придонес.
„Значи, пораката од САД дека европските сојузници мораа да се засилат е разбрана и тие навистина се движат во вистинската насока“, рече тој.
Трамп продолжи да ја критикува Алијансата, велејќи во текот на викендот дека не верува оти земјите од НАТО ќе ги поддржат САД доколку бидат нападнати.
Договорот на НАТО содржи одредба со која се гарантира взаемна одбрана на земјите-членки доколку некоја биде нападната.
За војната во Украина, Трамп повика на деескалација и се пожали на досега потрошените милијарди.
Разговорите во американскиот Сенат за договорот за безбедност на границата, кој некои го поставија како услов за дополнителна помош за Украина, наидоа на зголемено противење меѓу републиканците, кои се усогласени со Трамп.
