Во денешните израелски воздушни напади во северниот и централниот дел на Газа загинаа најмалку 17 Палестинци, според палестинските власти и извештаите на локалните медиуми.
Еден од нападите погоди куќа во областа Џабалија во северна Газа, додека друг го погоди бегалскиот камп Буреиј во центарот на Појасот Газа.
Израелската војска веднаш не ги коментираше нападите, но претходно во средата ги предупреди луѓето да ја евакуираат областа Буреиј, велејќи дека милитантите лоцирани таму истрелале ракети.
Израелската војска соопшти дека го убила Абд ал-Хади Сабах, милитант на Хамас кој помогнал да ја води инфилтрацијата во Кибуц Нир Оз за време на нападот на милитантната група на 7 октомври 2023 година врз јужен Израел.
Израел во средата предупреди дека ќе ги интензивира нападите во Газа доколку Хамас продолжи со ракетирањето.
„Сакам да испратам јасна порака оттука до шефовите на терористите во Газа: ако Хамас наскоро не дозволи ослободување на израелските заложници од Газа и продолжи да пука кон израелските заедници, ќе се соочи со удари со силен интензитет долго време не видени во Газа“, рече министерот за одбрана Израел Кац.
Израел постојано им кажува на луѓето да се преселат од делови на Газа во, како што вели војската, евакуации неопходни за безбедно спроведување на својата војна против милитантите на Хамас.
Обединетите нации и хуманитарните организации ја критикуваа израелската тактика, велејќи дека наредбите за евакуација честопати им даваат малку време на луѓето да заминат и дека немаат безбедни места за одење во Газа за да ги избегнат воздушните напади и израелските копнени операции.
Повеќе од 1.500 шатори каде се засолнуваат раселените луѓе низ Газа беа поплавени од обилните дождови во последните два дена, оставајќи ги луѓето изложени на студ, соопшти палестинската цивилна одбрана.
Војната во Газа започна кога милитантите на Хамас го нападнаа јужниот дел на Израел во октомври 2023 година, убивајќи 1.200 луѓе и земајќи околу 250 заложници.
Околу 100 заложници се држат во Газа, а најмалку една третина од нив се верува дека се мртви.
Во израелската контраофанзива во Газа загинаа најмалку 45.500 Палестинци, а повеќе од 108.000 беа повредени, според Министерството за здравство во енклавата.
Министерството не прави разлика меѓу милитантите и цивилите во својот број.
Војната уништи широки области на Газа и раселени 90% од нејзините 2,3 милиони луѓе.
САД, Обединетото Кралство, Европската Унија и други го прогласија Хамас за терористичка организација.
Некои информации во текстот се од Асошиетед прес, агенцијата Франс прес и Ројтерс
