Украинскиот претседател Володимир Зеленски денес рече дека има за цел да има подготвен план во ноември, за да му овозможи на Киев да одржи втор меѓународен самит за неговата визија за мир во Украина, на кој треба да присуствуваат претставници на Русија.
Украина беше домаќин на делегации од 92 земји на првиот самит во Швајцарија минатиот месец, за да го унапреди својот план за мир.
Русија, која ја нападна Украина во февруари 2022 година, не беше поканета на настанот и го отфрли како губење време.
„Поставив цел дека во ноември ќе имаме целосно подготвен план“, рече Зеленски на прес-конференција во Киев.
„Мислам дека претставниците на Русија треба да бидат на вториот самит“.
Тој ги даде забелешките по враќањето од посетата на Вашингтон на самитот на НАТО минатата недела. Украинските власти претходно рекоа дека руските претставници би можеле да бидат поканети на последователен самит.
Заменик-министер за надворешни работи на Русија минатата недела изјави дека Москва нема да присуствува на следниот самит.
Кремљ беше помалку категоричен и рече дека „нема прецизна суштина“ во врска со идејата за втор самит.
На првиот самит се разговараше за три од 10 точки што ги предложи Украина како мировна „формула“ на Зеленски, вклучително и безбедноста на храната, нуклеарната безбедност и ослободувањето на воените заробеници и децата.
Украинските власти соопштија дека на вториот самит ќе се разговара за планот однапред смислен од десетици земји поделени во работни групи.
Зеленски рече дека официјалните лица најверојатно ќе се сретнат во Катар на крајот на јули или на почетокот на август за да формираат став за енергетската безбедност.
Состанок за безбедноста на храната најверојатно ќе биде одржан во Турција во август и друг во Канада во септември за заробениците и децата, рече тој.
На бојното поле, руските сили напредуваат кон исток, искористувајќи ја предноста во бројот на војници и опрема.
Украина вели дека нејзината сопствена одбрана е зајакната со испораките на оружје од Запад во последните месеци.
Исто така, се очекува наскоро да ја добие првата серија борбени авиони Ф-16 од своите сојузници. Зеленски рече дека Украина ќе добие дел од борбените авиони ова лето и повеќе пред крајот на годината.
Тој рече дека не може да открие колку точно ќе ги има.
„Нема да има доволно. Тие сигурно ќе не` зајакнат, но дали ќе има доволно за да се борат на ниво со руските воздухопловни сили? Мислам дека нема да бидат доволни. Очекуваме поголем број“, им рече тој на новинарите.
Украина соопшти дека ѝ се потребни најмалку 128 Ф-16.
Киев, исто така, ги засили своите напори за мобилизација да прими повеќе цивили во вооружените сили.
Зеленски рече дека војската го информирала дека „сè оди според планот“, но дека има потреба од проширување на обуката.
„Во однос на капацитетите за обука, нема доволно“, рече тој. „Тие моментално се зголемуваат“.