Израелски тенкови и воени авиони ги бомбардираа областите на Рафа денес, изјавија палестински жители, откако американскиот претседател Џо Бајден вети дека ќе го задржи оружјето за Израел доколку неговите сили извршат голема инвазија на јужниот град Газа.
Додека преговорите за прекин на огнот продолжија во Каиро, палестинските милитантни групи Хамас и Исламски Џихад соопштија дека нивните борци истрелале противтенковски ракети и минофрлачи врз израелските тенкови насобрани во источната периферија на градот.
Жителите и медицинските лица во Рафа, најголемата урбана област во Газа која сè уште не е зафатена од израелските копнени сили, рекоа дека во израелски напад загинале најмалку три лица, а други биле ранети.
Израел вели дека милитантите на Хамас се кријат во Рафа, каде што населението е надополнето со стотици илјади жители на Газа кои бараат засолниште од бомбардирањето во крајбрежната енклава, и оти треба да ги елиминира заради сопствена безбедност.
Еден од раселените, Мохамад Абдер-Рахман, рече дека се плаши оти израелските бомбардирања предвидуваат инвазија на градот.
„Тоа ме потсетува на она што се случи пред израелските тенкови да упаднат во нашите станбени области во градот Газа, силното бомбардирање обично им дозволува на тенковите да движат кон местата што имаат намера да ги нападнат“, изјави 42-годишниот за Ројтерс преку апликација за пораки.
Преговорите за прекин на огнот во главниот град на Египет постигнаа одреден напредок, но не беше постигнат договор, според двајца египетски безбедносни извори.
„Во текот на изминатите неколку часа, прилагодувавме и додававме и бришевме точки врз основа на консултации со двете страни“, рече еден од изворите.
Делегацијата на Хамас замина во Доха на консултации, обвинувајќи го Израел за досегашниот недостиг на договор.
Претседателот на САД Џо Бајден, кој вели дека Израел не изготвил убедлив план за заштита на цивилите во Рафа, го кажа своето најстрого предупредување досега против целосна копнена инвазија.
„Јасно кажав дека ако влезат во Рафа, јас не го снабдувам оружјето“, изјави Бајден во интервју за Си-Ен-Ен вчера.