Испораките на жито од украинското пристаниште Одеса продолжија денеска. Товарниот брод „Разони“ под знамето на Сиера Леоне беше првиот што го напушти пристаништето, носејќи пченка за Либан. Во соопштение, турското Министерство за одбрана објави дека и други бродови ќе заминат од Украина попладнево.
Турција и Обединетите нации посредуваа за договор со Русија и Украина кон крајот на јули за да се врати извозот на жито во услови на глобална прехранбена криза за која ОН велат дека е влошена со руската инвазија на Украина.
Договорот предвидува безбедно минување на товарните бродови кои патуваат од пристаништата во јужна Украина преку водите во Црното Море што Русија ги контролира од почетокот на војната кон крајот на февруари. Украинскиот министер за надворешни работи Дмитро Кулеба го поздрави продолжувањето на извозот од Одеса.
„Ден на олеснување за светот, особено за нашите пријатели на Блискиот Исток, Азија и Африка, кога првото украинско жито ја напушта Одеса по неколкумесечна руска блокада“, напиша Кулеба на Твитер. „Украина отсекогаш била сигурен партнер и ќе остане доколку Русија го почитува својот дел од договорот“, изјави Кулеба.
The day of relief for the world, especially for our friends in the Middle East, Asia, and Africa, as the first Ukrainian grain leaves Odesa after months of Russian blockade. Ukraine has always been a reliable partner and will remain one should Russia respect its part of the deal.
— Dmytro Kuleba (@DmytroKuleba) August 1, 2022
Портпаролот на Кремљ, Дмитриј Песков, изјави дека испловувањето на првиот брод е „многу позитивно“.
Портпаролот на генералниот секретар на ОН, Антонио Гутереш, рече дека обезбедувањето жито да стигне до светските пазари „е хуманитарен императив“.
„Генералниот секретар се надева дека ова ќе биде прв од многуте комерцијални бродови што ќе се движат во согласност со потпишаната иницијатива и дека тоа ќе донесе многу потребни стабилност и олеснување на глобалната безбедност на храната, особено во најкревките хуманитарни контексти“, се вели во изјавата на Стефани Дујарик.
Дујарик додаде дека Светската програма за храна планира да купи 30.000 метрички тони пченица за да ги натовари и испрати од Украина на брод изнајмен од ОН.