Прекинот на огнот меѓу Израел и милитантната група Хезболах со седиште во Либан стапи на сила рано денес, со што прекинаа борбите за кои американските и француските лидери рекоа дека може да создаде пат кон ново примирје во појасот Газа.
Како што стапи на сила прекинот на огнот, имаше редици автомобили кои се движеа кон јужен Либан, каде повеќемесечните засилени борби и израелските наредби за евакуација ги принудија луѓето да ги напуштат своите домови.
Израелската војска ги предупреди луѓето да се држат настрана од селата каде што претходно нареди евакуација.
САД, заедно со Франција, одиграа клучна улога во посредувањето во спогодбата, која израелскиот безбедносен кабинет го одобри доцна вчера.
Американскиот претседател Џо Бајден го нарече прекинот на огнот „критичен чекор ... за ставање крај на насилството“ на Блискиот Исток.
Тој рече дека Иран и неговите полномошници, Хезболах во Либан и милитантите на Хамас во Газа, „платиле висока цена“ за повеќе од една година борби со израелските сили.
Тој рече дека договорот меѓу Израел и Хезболах „е дизајниран да биде траен прекин на непријателствата“.
Но, Бајден предупреди: „Да бидам јасен, ако Хезболах или некој друг го прекрши договорот и претставува директна закана за Израел, тогаш Израел го задржува правото на самоодбрана во согласност со меѓународното право“.
Лидерот на САД во заминување, на помалку од два месеца до неговиот четиригодишен мандат, рече дека кога Хезболах се согласил да ги прекине нападите врз Израел, „Хамас има избор да направи. Нивниот единствен излез е да ги ослободат заложниците [што ги држи во Газа], вклучувајќи ги и американските граѓани“.
„Во текот на следните денови, САД ќе направат уште еден притисок за Турција, Египет, Катар, Израел и другите да постигнат прекин на огнот во Газа“, рече Бајден.
Израелскиот премиер Бенјамин Нетанјаху рече дека се залага за примирје со Хезболах за Израел да може да го насочи своето внимание на пошироката закана од Иран, да ги освежи своите сили и да го изолира Хамас во неговата тековна борба против Израел во Газа.
Нетанјаху вети дека ако Хезболах ги обнови нападите врз Израел или пак се вооружи, Израел веднаш ќе продолжи со бомбардирањето на милитантните локации во Либан.
„Должината на прекинот на огнот ќе зависи од тоа што ќе се случи во Либан“, рече Нетанјаху.
„Со целосно разбирање на САД, ние ја зачувуваме целосната воена слобода на дејствување - ако Хезболах го прекрши договорот и се обиде да се вооружи, ние ќе нападнеме“.
Договорот за прекин на огнот, постигнат со посредство на американски и француски дипломати, вклучува прекин на борбите и 60-дневен период во кој Израел и Хезболах ќе се повлечат од јужен Либан.
Пред договорот, американскиот државен секретар Ентони Блинкен им рече на новинарите на прес-конференција на состанокот на министрите за надворешни работи на Г-7 во Италија дека прекинот на огнот е „најдобриот начин да се гарантира дека има мир, има стабилност“.
Блинкен рече дека договорот за ставање крај на борбите меѓу Израел и Хезболах, исто така, може да го поттикне Хамас да постигне долго закочен пакт за прекин на огнот во Газа, бидејќи повеќе нема да има сојузник финансиран од Иран кој се бори против Израел на вториот фронт во северен Израел и Либан.
Според примирјето, израелските сили се обврзани да се повлечат јужно од либанско-израелската граница.
Планот предвидува либанската армија, која не е вклучена во борбите меѓу Израел и Хезболах, да патролира во регионот меѓу двете завојувани страни.
Дописничката на Гласот на Америка од Стејт департментот Најки Чинг, дописничката од ОН Маргарет Бешеер и од Белата куќа Патси Видакусвара придонесоа за овој текст. Некои информации се од АП, агенцијата Франс- прес и Ројтерс
