Европската Унија и Украина денес ги започнаа преговорите за членство, процес кој може да потрае со години и кој Русија историски се обидуваше да го спречи.
Разговорите доаѓаат една деценија откако руските трупи го зазедоа полуостровот Крим за да ја спречат Украина да воспостави односи со Западот.
Пристапните преговори започнаа за време на меѓувладина конференција одржана во Луксембург.
„Денес се означува почетокот на новото поглавје во односите меѓу Украина и Европската Унија“, рече украинскиот премиер Денис Шмигал на почетокот на разговорите.
Украинскиот претседател Володимир Зеленски во објава на социјалната мрежа Икс откако ЕУ се согласи на разговори рече:
„Генерации на нашиот народ го остваруваат својот европски сон. Украина се враќа во Европа“.
И Молдавија денес треба да ги започне преговорите за членство во ЕУ.
Земја-кандидатот мора да ги усогласи своите закони и стандарди со политиката на ЕУ за прашања кои вклучуваат движење на стоки, грижи за животната средина и безбедност.
Сите 27 земји-членки мора да се согласат за проширување на ЕУ.
Унгарија историски беше пречка за поддршката на Украина од ЕУ и НАТО.
„Сè уште сме на почетокот на процесот на скрининг. Многу е тешко да се каже во која фаза е Украина. Од она што го гледам овде, додека зборуваме, тие се многу далеку од исполнувањето на критериумите за пристап“, рече унгарскиот министер за европски прашања Јанош Бока.
Ако ѝ се даде статус на членка, Украина ќе ја надмине Франција по територија и ќе стане најголемата членка на блокот.
Нејзиниот статус како врвен производител на жито, исто така, ќе влијае на земјоделската политика на ЕУ.
Разговорите, иако се пресвртница, може да потраат со години за да се финализираат.
Формалните преговори најверојатно нема да започнат за неколку месеци.
Турција е во пристапни преговори речиси две децении без исход. Други земји кои чекаат се Албанија, Босна и Херцеговина, Грузија, Црна Гора, Северна Македонија и Србија.
Украина бара членство до 2030 година, но прво мора да заврши десетици институционални и правни реформи.
