Со освојување на гласовите во сојузната држава Аризона, која важеше за една од неизвесните држави, Доналд Трамп, новоизбраниот претседател на САД ја комплетира победата со освоени 312 електорски гласови, наспрема 226 електорски гласови за неговата противкандидатка, Камала Харис, проектираа американските медиуми.
На изборите во 2020 година, токму гласовите од Аризона беа клучни за победата на демократот и актуелен претседател на САД, Џо Бајден. Според проектираниот резултат, Трамп на минатонеделните избори во Аризона ги освои максиналните 11 електорски гласови.
Трамп на минатонеделните избори победи и според гласовите на избирачите, со разлика од околу четири милиони гласови, во споредба со Харис.
Републиканците веќе ја вратија контролата врз Сенатот и имаат добри изгледи го задржат мнозинството и во Претставничкиот дом, благодарение на поддршката од гласачите од белата работничка класа, како и од голем дел од латино заедницата во САД.
Останатите шест сојузни држави од претседателската трка, каде резултатот беше неизвесен, а во кои сепак Трамп победи се Пенсилванија, Висконсин, Мичиген, Северна Каролина, Невада и Џорџија.
Белата куќа деновиве соопшти дека Бајден ќе се сретне со новоизбраниот претседател во Белата куќа во среда.
Овој тип на средба меѓу претседателите во заминување и доаѓањето се сметаше за вообичаен во САД. Но, Трамп не го покани Бајден на средба после изборите во 2020 година, откако изнесе тврдења за наводна изборна измама што кулминираше со немирите во Капитол на 6 јануари 2021 година.
Трамп, исто така, ја прекрши традицијата со тоа што ја прескокна инаугурацијата на Бајден. Сепак, Белата куќа деновиве соопшти дека демократскиот претседател ќе присуствува на претстојната церемонија за инаугурација на Трамп.
Средбата на Бајден со Трамп ќе се одржи во Овалната соба, соопшти вчера Белата куќа.
Излезните анкети покажаа дека главната грижа на гласачите останаа економијата и инфлацијата.
Во меѓувреме, во САД, не стивнуваат реакциите после изборите на 5 ноември. Особено превирања има во редовите на демократите кои ја бараат вината за поразувачкиот резултат.
Поранешната претседателка на Претставничкиот дом, Ненси Пелоси, го обвини Бајден, велејќи за „Њујорк тајмс“ дека „доколку претседателот излегол порано од трката за претседател, можеби ќе имало други кандидати во трката“.
Додека демократите одмеруваат што тргнало наопаку, Трамп почна да ја собира својата втора администрација со именување на менаџерката на кампањата Сузи Вајлс да биде шефица на неговиот кабинет во Белата куќа.
Таа е првата жена што е именувана за улогата на висок профил и првото назначување на републиканецот во неговата администрација.
Делови од оваа објава се преземени од Асошиејтед прес.
Facebook Forum