Претседателот на САД Доналд Трамп ја прекина помошта за Украина, објави Белата куќа доцна вчера.
„Претседателот беше јасен дека е фокусиран на мир“, изјави висок функционер на администрацијата за Гласот на Америка преку имејл.
Официјалното лице не го именуваме, како што е вообичаено при разговори со новинари.
„Потребно ни е и нашите партнери да бидат посветени на таа цел. Ја паузираме и ја разгледуваме нашата помош за да осигураме дека таа придонесува за решение“.
Украинскиот претседател Володимир Зеленски во своето ноќно обраќање вчера, рече дека на неговата земја ѝ треба „вистински, праведен мир“, како и безбедносни гаранции за да осигура дека Русија повторно нема да ѝ се заканува на Украина во иднина.
„Токму недостигот на безбедносни гаранции за Украина пред 11 години ѝ дозволи на Русија да започне со окупацијата на Крим и војната во Донбас“, рече Зеленски.
„Потоа, отсуството на безбедносни гаранции ѝ овозможи на Русија да започне целосна инвазија. И сега, бидејќи сè уште нема дефинирани безбедносни гаранции, Русија е таа што ја продолжува оваа војна“.
Портпаролот на Кремљ Дмитриј Песков, изјави за новинарите денес, дека прекинот на воената помош на САД за Украина е најдобриот придонес за каузата за мир и дека тоа може да помогне да се поттикне Украина да се вклучи во мировниот процес.
На Трамп му беше посочено во понеделникот дека договорот за ретки минерали е клучен за континуираната американска поддршка на Украина и рече дека ќе објави соопштение за тоа денес кога ќе зборува пред заедничката седница на Конгресот.
Ким Луис придонесе за овој текст. Некои информации се од АП, Франс-прес и Ројтерс
