Хутите денес соопштија дека истрелале неколку проектили врз американски воен брод во Црвеното Море и дека планираат да продолжат да гаѓаат американски и британски бродови.
Изјавата дојде неколку часа откако Централната команда на американската војска соопшти дека соборила противбродска крстосувачка ракета истрелана од Јемен од Хутите, поддржани од Иран.
Централната команда на американската војска во своето соопштение рече дека нема повредени или штета од нападот.
Хутите извршија повеќе од 30 напади со проектили и беспилотни летала во Црвеното Море од средината на ноември, предизвикувајќи огромни прекини на комерцијалниот превоз во клучниот воден пат.
Многу бродски компании ги променија своите операции како одговор, испраќајќи бродови на многу подалечна и поскапа рута да одат околу Африка, наместо да ја користат врската помеѓу Црвеното Море и Средоземното Море.
САД и Велика Британија извршија напади насочени кон ракетни и воени локации на Хути во Јемен, а исто така работеа на попречување на беспилотните летала и ракетите истрелани од Хутите.
Портпаролот на Пентагон, генерал-мајор Пат Рајдер, вчера изјави дека САД дејствувале „за да ги заштитат меѓународните бродови и морнарите кои транзитираат по Црвеното Море, како и да ја деградираат и попречат способноста на Хутите да вршат вакви напади“.
Европската Унија (ЕУ) размислува да започне сопствена мисија за заштита на Црвеното Море. Шефот за надворешна политика на ЕУ Жозеп Борел, денес изјави дека се надева оти иницијативата ќе започне во наредните недели и дека ќе биде фокусирана на блокирање на нападите на Хутите, а не на преземање директни дејствија против Хутите.
Борел рече дека многу европски фирми побарале акција поради високите трошоци за пренасочување на бродовите низ Африка.
Дел од информациите во текстот се од агенцијата Франс-прес и Ројтерс
