Русија денес нападна воени и инфраструктурни цели во главниот град на Украина Киев и низ другите делови на земјата, вклучително и западните области далеку од линијата на фронтот, соопштија украинските власти.
Претседателот Володимир Зеленски ја пофали украинската воздушна одбрана за соборувањето на повеќе од 30 беспилотни летала и рече дека украинските сили ги уништуваат руските сили во источниот и јужниот дел.
Неговиот командант на копнените сили и заменик-министерот за одбрана објавија успеси во контраофанзива во двете области.
Руското министерство за одбрана соопшти дека руските сили погодиле и уништиле осум складишта за муниција низ Украина во претходните 24 часа и ги одбиле украинските напади во три области.
Се наведува дека украинските сили се обиделе да го нападнат источниот град Доњецк, кој е под контрола на Русија, и јужниот регион Запорожје, но биле одбиени.
Канцеларијата на Зеленски соопшти дека беспилотните летала го нападнале регионот на Киев во неколку бранови во текот на повеќе од четири часа.
Киев соопшти дека повторно зазеле 113 квадратни километри земја и осум населби од руските сили. Но, најновите напади покажаа дека Русија е способна да води војна надвор од првите линии на фронтот.
Во своето ноќно видеообраќање, Зеленски рече дека украинските сили „на југ и на исток активно го уништуваат непријателот, физички ја чистат Украина“.
„Одбраната од теророт значи уништување на терористите. И тоа е гаранција дека државата на злото никогаш нема да има можност да донесе зло во Украина“.
Генералот Олександер Сирскиј, командант на копнените сили на Украина, на Телеграм рече дека неговите војници напредуваат на крилата на разурнатиот источен град Бахмут, кој падна во рацете на руските платеници минатиот месец по неколкумесечни борби.
Ројтерс не можеше независно да ги потврди извештаите.
Рускиот министер за одбрана Сергеј Шојгу изјави дека Москва има информации дека Украина планира да го нападне Крим контролиран од Русија со американски и британски ракети со поголем дострел и предупреди дека Русија ќе возврати ако тоа се случи.
Русија го анектира Кримскиот Полуостров на Црното Море од Украина во 2014 година, но смета дека е надвор од опсегот на нејзината „специјална воена операција“ во источна и јужна Украина.
Извор: Ројтерс
