Рејтингот на американскиот претседател Џо Бајден благо се зголемил во последниот месец, според анкетата спроведена од Ројтерс/Ипсос, додека повеќе Американци ги наведоа екстремизмот и заканите за демократијата како нивна најголема грижа пред изборите на 5 ноември.
Две петтини од анкетираните Американци рекле дека ја одобруваат работата на Бајден, додека 56% рекле дека не ја одобруваат. Тоа е благ пораст од минатомесечната анкета, која покажа дека 37 отсто од испитаниците го одобруваат Бајден, што е блиску до најниското ниво на неговото претседателствување.
Анкетата на Интернет беше спроведена од 22 до 24 март, по годишното обраќање на Бајден за состојбата на нацијата пред Конгресот, каде што тој одржа енергичен говор, предизвикувајќи ги републиканците, имајќи за цел да ја намали загриженоста за неговата возраст и сила.
Бајден (81) бара втор мандат на функцијата, каде што се очекува да се соочи со поранешниот претседател Доналд Трамп (77).
Нешто поголем број испитаници, исто така, изразиле загриженост за политичкиот екстремизам или заканите за демократијата, при што 23% од испитаниците рекле дека тоа е нивната најголема грижа, за разлика од 21% минатиот месец.
Повеќе од една третина од демократите - 36 отсто - изјавиле дека тоа е нивната најголема грижа, додека 11 отсто од републиканците и една четвртина од независните гласачи го кажале истото.
Трамп, без докази, тврди дека му биле украдени изборите во 2020 година, вклучително и во жесток говор непосредно пред стотици негови поддржувачи да упаднат во Конгресот на САД во 2021 година. Пет лица загинаа.
Трамп се соочува со неколку правни предизвици, вклучително и некои поврзани со неговата улога во обидот да ги поништи резултатите од изборите во 2020 година.
За време на кампањата, Трамп рече дека ќе ги ослободи луѓето кои се затворени за нивната улога во нападот на 6 јануари и ги нарече „заложници“. Тој, исто така, даде серија расистички и потпалувачки изјави неодамна.
Други главни прашања за гласачите беа економијата, за која 19% од испитаниците изјавиле дека е најважниот проблем за земјата, и имиграцијата, која 17% од испитаниците ја навеле како главно прашање.
Додека 32 отсто од републиканските гласачи рекле дека имиграцијата е нивна главна грижа, тоа е намалување од минатомесечната анкета, која покажа дека 38 отсто од републиканците ја гледаат како главен проблем за земјата.
Гласачите главно не ги одобриле институциите во земјата.
Повеќето испитаници имале неповолни мислења за Претставничкиот дом (65%), Сенатот (60%) и Врховниот суд (56%).
Федералните резерви се единствената институција која мнозинството ја фаворизирало, со поволен став на 53% од испитаниците на анкетата.
Централната банка на САД ги зголеми каматните стапки од март 2022 година, во обид да ја намали инфлацијата, но ги задржа стапките стабилни од јули, и се очекува да ги намали стапките подоцна оваа година.
Анкетата на Ројтерс/Ипсос собра одговори на интернет од 1.021 возрасно лице, користејќи национално репрезентативен примерок, со маргина на грешка од околу 3 процентни поени.
