Набргу откако Џо Бајден објави дека се повлекува од ноемвриската претседателска трка во недела, републиканскиот претседателски кандидат Доналд Трамп побара Бајден да поднесе оставка од функцијата.
„Неискрениот Џо Бајден не беше способен да се кандидира за претседател, и секако не е способен да служи - и никогаш не бил!“, рече Трамп рече во соопштението на социјалните мрежи што вклучуваше нов притисок за собирање средства.
Трамп го нарече Бајден „најлошиот претседател, убедливо, во историјата на нашата нација“.
Претседателот на Претставничкиот дом Мајк Џонсон и другите републикански законодавци лојални на Трамп ги повторија барањата на Трамп.
„Ако Џо Бајден не е способен да се кандидира за претседател, тој не е способен да служи како претседател. Тој мора веднаш да поднесе оставка од функцијата. 5 ноември не може да пристигне доволно брзо“, се вели во соопштението на Џонсон.
Конгресменката Елис Стефаник, четврторангирана републиканка во Претставничкиот дом, додаде:
„Ако Џо Бајден не може да се кандидира за реизбор, тој не е во состојба и не е способен да служи како претседател на САД. Тој мора веднаш да поднесе оставка“.
„Ако Демократската партија сметаше дека Џо Бајден не е способен да се кандидира за реизбор, тој секако не е способен да ги контролира нашите нуклеарни кодови. Бајден мора веднаш да се повлече од функцијата“, рече на социјалните мрежи, третиот по ред републиканец во Претставничкиот дом Том Емер.
Законски, барањата на републиканците за оставка на Бајден немаат никакво значење.
Претседателот има овластување да го отслужи остатокот од својот мандат, рече Мајкл Торнинг, директор во Двопартиски политички центар.
Белата куќа не одговори на барањето на Гласот на Америка за коментар во врска со барањата на републиканците.
Од понеделник наутро, нема одговор од демократските лидери на републиканските повици Бајден да поднесе оставка.
Но, како одговор на неговото повлекување од трката, тие го пофалија Бајден за неговото наследство и служба.
„Џо Бајден не само што беше одличен претседател и одличен законодавен лидер, туку тој е навистина прекрасно човечко суштество“, рече лидерот на мнозинството во Сенатот Чак Шумер во изјавата.
„Неговата одлука, се разбира, не беше лесна, но тој повторно ја стави својата земја, неговата партија и нашата иднина на прво место“.
Во изјавата, лидерот на Демократската партија во Претставничкиот дом Хаким Џефрис го нарече Бајден „еден од најуспешните лидери во американската историја“.
Поранешната претседателка на Претставничкиот дом Ненси Пелоси, која наводно била една од неколкуте законодавци кои го охрабрувале Бајден да се повлече, го нарече „патриотски Американец кој секогаш ја ставал нашата земја на прво место“.
„Неговите наследство на визија, вредности и лидерство го прават еден од најзначајните претседатели во американската историја“, рече таа во изјавата.
Одлуката на Бајден да се повлече е потсетник „дека тој е патриот од највисок ред“, рече поранешниот претседател Барак Обама во изјавата.
„Џо подобро од кој било го разбира влогот на овие избори - како сето она за што се борел во текот на својот живот и сето она за што се залага Демократската партија, ќе биде загрозено ако дозволиме Доналд Трамп да се врати во Белата куќа и да им дадеме контрола на републиканците врз Конгресот“, додаде Обама.
Барањата на републиканците за оставка на Бајден додадоа превирања во американската политика по најавата на Бајден што го остави патот напред за демократите неизвесен.
Тие „играат политика“, рече за републиканците Лари Сабато, директор на Центарот за политика на Универзитетот на Вирџинија.
„Здравиот разум ни кажува дека Бајден има две работни места со полно работно време во моментов - да биде претседател и да се кандидира за претседател“, изјави Сабато за Гласот на Америка.
„Сега тој ќе има една работа со полно работно време и се покажа дека е добар во тоа. Тој може да ги заврши преостанатите месеци и да замине достоинствено“.
Бајден објави дека се повлекува од демократската изборна трка во писмо до земјата што го објави на социјалните мрежи во неделата попладне.
Тој рече дека иако имал намера да се кандидира за реизбор, тој верува дека „во најдобар интерес за мојата партија и за земјата е да се откажам и да се фокусирам исклучиво на исполнување на моите должности како претседател до крајот на мојот мандат“.
Соопштението ја смени неговата одлука за останување во трката во 2024 година поради зголемениот притисок од демократите по неговите слаби перформанси на минатомесечната дебата против Трамп.
Со заминувањето на Бајден настрана, националното внимание сега се префрла директно на Демократската партија и тие би направиле добро да го искористат ова внимание, рече Вилијам Хауел, професор по американска политика на Универзитетот на Чикаго.
„Тие треба да го покажат својот талент, да ја рекламираат својата визија за иднината и да дадат се` од себе за да го променат наративот на оваа претседателска кампања“, рече тој за Гласот на Америка.
Бајден ја поддржа потпретседателката Камала Харис како нов демократски претседателски кандидат и рече дека ќе зборува повеќе за својата одлука подоцна оваа недела.
Во соопштението објавено неколку часа по најавата за повлекување на Бајден, Белата куќа рече дека Бајден „разговарал со голем број членови на Конгресот, гувернери и поддржувачи и ќе продолжи да комуницира со клучните засегнати страни вечерва и утре“.
