ВАШИНГТОН, 21 јули - Претседателот Џо Бајден во неделата изјави дека ќе се повлече од трката за претседателските избори во 2024 година, ставајќи ги САД на непозната територија.
Бајден ја поддржа потпретседателката Камала Харис да биде кандидат на Демократската партија оваа година.
Пред Бајден да ја објави одлуката на Ројтерс разговараше со Елејн Камарк, висока соработничка во Институцијата Брукингс, членка на Демократскиот национален комитет и авторка на книгата „Примарна политика“ за процесот на номинација за претседател, за тоа што би можело да се случи следно.
Таа одговори:
„Бајден ги помина последните неколку месеци собирајќи речиси 4.000 демократски делегати со што победи на прелиминарните избори во американските држави и територии.
Тие делегати вообичаено би гласале за него да биде официјален претседателски кандидат на партијата на Демократската национална конвенција што треба да се одржи од 19 до 22 август, но правилата не ги обврзуваат ниту ги принудуваат да го сторат тоа. Делегатите можат да гласаат со својата совест, што значи дека би можеле да го дадат својот глас на некој друг.
Со повлекување на Бајден всушност се „ослободуваат“ делегатите потенцијално отварајќи простор за конкуренција меѓу други демократски кандидати да станат номинирани.
Неколку кандидати би можеле да влезат во трката.
Потпретседателката Камала Харис е на врвот на листата, но таа имаше проблеми по лошиот почеток во работата и лошите анкети. Уставот на САД налага потпретседателот да стане претседател доколку претседателот умре или биде онеспособен, но тоа не влијае на меѓупартискиот процес за избор на кандидат.
Гувернерот на Калифорнија, Гевин Њусом, гувернерот на Мичиген, Гретчен Витмер, гувернерот на Кентаки, Енди Бешеар и гувернерот на Илиноис, Џ.Б. Прицкер, сите се можни замени. Досега тие беа поддржувачи на Бајден кои работеа да му помогнат да биде избран.“
Се очекува да има околу 4.672 делегати во 2024 година, вклучувајќи 3.933 заложени делегати и 739 таканаречени суперделегати - високи партиски членови.
За да ја обезбеди номинацијата, кандидатот треба да добие мнозинство - односно повеќе гласови од сите други заедно.
Ако никој не го постигне тоа, тогаш би имало „конвенција со посредство“ на која делегатите се однесуваат како слободни агенти и преговараат со раководството на партијата.
Може да бидат потребни неколку круга на гласање за некој да добие мнозинство и да стане номиниран.
Кампањата Бајден-Харис имаше 91 милион долари во банката на крајот на мај, но експертите за законот за финансирање на кампањата не се согласуваат околу тоа колку лесно парите би можеле да се префрлат.
Бидејќи Харис е исто така на документите за поднесување на кампањата, многу експерти веруваат дека парите би можеле да ѝ бидат префрлени ако таа е на ливчето.“
