Организацијата на ОН која помага во истрагата за најтешките злосторства во Сирија во понеделникот соопшти дека новите власти на земјата биле „многу приемчиви“ на барањето за соработка за време на штотуку завршената посета на Дамаск.
Посетата предводена од Роберт Петит, шеф на Меѓународниот, непристрасен и независен механизам за Сирија, беше прва по формирањето на организацијата од страна на Генералното собрание на ОН во 2016 година. Создадена за да помогне во собирањето докази и гонење на поединци одговорни за можни воени злосторства, злосторства против човештвото и геноцид од почетокот на граѓанската војна во Сирија во 2011 година.
Петит ја истакна итноста да се зачуваат документите и другите докази пред да бидат изгубени.
Откако бунтовниците го соборија сирискиот претседател Башар ал-Асад, се зголемуваат барањата од Сиријците за гонење на одговорните за злосторствата и убиствата додека тој беше на власт.
„Падот на владеењето на Асад е значајна можност за нас да го исполниме нашиот мандат на терен“, рече Петит. „Времето истекува. Има мал прозорец на можности да се обезбедат овие локации и материјалот што го чуваат“.
Портпаролот на ОН, Стефан Трембли, во понеделникот изјави дека истражниот тим „се подготвува за оперативно распоредување што е можно порано и штом ќе биде овластен да спроведува активности на сириска територија“.
Портпаролот на организацијата кој беше на патување со Петит, за Асошиетед прес вели дека „се подготвуваме да се распоредиме со очекување дека ќе добиеме овластување“.
„Претставниците од привремените власти беа многу приемчиви на нашето барање за соработка и се свесни за обемот на задачата што претстои“, рече портпаролот, говорејќи под услов да не биде именуван. „Тие нагласија дека ќе им биде потребна експертиза за да се заштити новодостапната документација“.
Организацијата не откри со кои функционери во новата влада се сретнала или локацијата што Петит ја посетил потоа.
„Дури и во еден објект“, рече Петит, „планините од владина документација ја откриваат застрашувачката ефикасност на системизирањето на злосторствата на режимот“.
Тој рече дека ќе бидат потребни колективни напори на Сиријците, граѓанските организации и меѓународните партнери, како приоритет, „за да се зачуваат доказите за извршените злосторства, да се избегне дуплирање и да се осигура дека сите жртви се инклузивно застапени во потрагата по правдата“.
Во јуни 2023 година, Генералното собрание од 193 члена формираше Независна институција за исчезнати лица во Сириската Арапска Република за да се разјасни судбината и локацијата на повеќе од 130 000 лица исчезнати како резултат на конфликтот.
