Здружението на новинари на Македонија и Самостојниот синдикат на новинари и медиумски работници ја осудуваат, како што велат, тековната кампања за оцрнување насочена кон независните и критички настроени медиуми во Северна Македонија.
Оваа кампања, додаваат од ССНМ има за цел да ги дискредитира медиумите и новинарите кои откриваат корупција, злоупотреба на моќта и други прашања од јавен интерес.
„Лажниот наратив дека овие медиуми добиле средства од УСАИД за да ја поткопаат демократијата претставува обид да се делегитимира нивната работа, иако нивното известување доведе до законски реформи, кривични истраги и санкции против одговорните за разни злоупотреби. Овие медиумски кампањи за оцрнување, единствено имаат за цел да го замолчат независното и критичко новинарство и да ја нарушат довербата во медиумите пред граѓаните“, пишува во реакцијата на ССНМ и ЗНМ.
Кампањата за оцрнување, велат од овие здруженија, дополнително ескалира на социјалните мрежи, каде што поттикнува омраза кон новинарите, вклучително и мизогини напади и закани кон новинарки.
„Ваквата реторика не само што потенцијално ја загрозува безбедноста на поединците, туку создава и клима на страв, со што директно се обесхрабрува слободното и професионално новинарство“, реагираат ССНМ и ЗНМ.
Претседателот на ССНМ, Павле Беловски, за Гласот на Америка вели дека ваквите кампањи и провокации за оцрнување на медиумите може да доведат и до физички напади врз таргетираните новинари, што неминовно води до авто-цензура и загрозување на слободата на изразување.
Тој потенцира дека освен законот за граѓанска одговорност кој ги санкционира навредата и клеветата, на сила е и член од кривичниот законик со кој напад врз медиумски работник се казнува како напад врз службено лице.
Беловски вели дека главен императив на ССНМ е обезбедување на гаранции за поголема безбедност на медиумските работници во физичка, и во егзистенцијална смисла.
„Оттука не може да се занемари суспендирањето на поддршката за медиуми, редакции од страна на американските државни фондови со што го отвара за нас најгорливиот проблем, а тоа е опасноста за отпуштање на медиумски работници, но и затворање на цели редакции. Медиумите поддржани од донации и фондови во изминатите години пружаа квалитет и стандард на новинарско работење што беше стремеж и за останатите редакции. ССНМ е загрижен дека губењето на работните места по која било основа, особено во поголем обем, ќе го наруши пазарот на трудот и одново може да не втурне во непосакуваниот прекаријат. Ќе се обезвреднат платите на медиумските работници, а праксата покажува дека така се намалуваат и работничките права“, вели Беловски.
Американската администрација во моментов прави ревизија на федералните пари користени за различни програми во странство и во САД за да се утврди целисходноста на тие фондови и нивната усогласеност со приоритетите на администрацијата на претседателот Доналд Трамп.
Весна Колоска, уредничка во Македонски медиа сервис, вели дека последните случувања не смеат да се потценат.
„Не навлегувам во тоа дали фер била распределбата на таа странска помош за медиумите или за резултатите и дали придонела за поголема демократизација на македонското општество. Тоа е потценување на интелигенцијата на граѓаните. Но, факт е дека во моментов се води црна кампања која навлегува во сигурноста на новинарите“, вели Колоска.
ЗНМ и ССНМ ги повикуваат надлежните институции да обезбедат заштита на новинарите од вознемирување и закани и ја повикуваат јавноста да ги отфрли дезинформациите и да ја поддржи независната медиумска работа, „која е од суштинско значење за демократијата и одговорноста на институциите и политичарите“.
Оваа ситуација е релативно нова со оглед на тоа што во последниот извештај на организацијата Репортери без граници за слобода на медиумите, од мај 2024 година, Северна Македонија е рангирана на 36 место од 180 држави во светот, со напредок од две места во однос на претходната година, што ја вбројува во држави со задоволителна состојба во однос на слободата на медиумите.
