ВАШИНГТОН – Независна комисија која го истражуваше обидот за атентат на Доналд Трамп на предизборен митинг во Пенсилванија, ја обвини Тајната служба за лошата комуникација тој ден и неуспехот да ја обезбеди зградата од каде напаѓачот пукаше. Испитувањето, исто така, откри повеќе системски проблеми во агенцијата, како што е неуспехот да се разберат уникатните ризици со кои се соочува Трамп.
Извештајот од 52 страници, објавен денеска, ја наведе Тајната служба за конкретни проблеми што доведоа до митингот на 13 јули во Батлер, како и за подлабоките проблеми во агенцијата. Се препорача да се донесе ново, надворешно раководство и повторно да се фокусира на својата заштитна мисија.
„Тајната служба како агенција бара суштински реформи за да ја изврши својата мисија“, напишаа авторите на секретарот Алехандро Мајоркас од Одделот за домашна безбедност, матичната агенција на Тајните служби, во писмото што го придружува нивниот извештај. „Без таа реформа, Независната комисија која го истражуваше случајот верува дека може и ќе се случи уште еден Батлер“ (градот во Пенсилванија каде што има обид за атентат врз Трамп).
Еден учесник на митингот беше убиен, а двајца други беа ранети кога Томас Мајкл Крукс се качи на покривот на блиската зграда и отвори оган додека Трамп говореше на бината. Поранешниот претседател беше ранет во увото пред да биде придружен од агентите на Тајната служба. Тоа пукање, заедно со уште еден инцидент во Флорида, кога Трамп играше голф – вооружен маж таму никогаш не стигна до местото на претседателот ниу пукаше – доведе до криза во довербата во агенцијата.
Извештајот на Комисијата од четворица поранешни службеници за спроведување на законот од национално и државно ниво следи по истрагите на членовите на Конгресот, сопствените истражители на агенцијата и надзорното тело на Одделот за домашната безбедност на САД.
Клучните наоди и препораки од извештајот:
Слаби комуникации, без план за клучни згради
Комисијата ги повтори претходните извештаи кои се осврнаа на неуспехот да се обезбеди зградата во близина на митингот што имаше јасна линија до местото каде што зборуваше Трамп и повеќекратните проблеми со комуникацијата што ја попречуваа способноста на Тајната служба и локалните и државните органи за спроведување на законот да разговараат еден со друг.
„Неуспехот да се обезбеди комплекс од згради, чии делови беа на приближно 120 метри од 30 заштитникот и содржеа бројни позиции кои носат ризик од видното поле со висок агол, претставува критичен безбедносен неуспех“, се вели во извештајот.
Комисијата наведува дека е погрешен планот меѓу Тајната служба и локалните полициски органи и рече дека Тајната служба не прашала што се прави за да се обезбеди зградата: „Потпирањето на општо разбирање дека „локалното население ја покрива таа област“ едноставно не е доволно добро и, всушност, кај Батлер ваквиот став придонесе за неуспех на безбедноста“.
Комисијата, исто така, го наведе фактот дека имало две одвоени командни пунктови на митингот на Батлер: едно со различни локални органи за спроведување на законот и друго со Тајната служба: „Ова создаде, на највисоко ниво, структурна поделба во протокот на комуникации“.
Имаше и други проблеми во комуникацијата.
Тајната служба мораше да ги смени радио каналите бидејќи радио сообраќајот на агенти кои ја штитат првата дама Џил Бајден на настан во Питсбург се појавуваше на каналите на агентите кои го покриваа митингот на Батлер.
Комисијата, исто така, забележа дека целиот персонал за спроведување на законот на терен користел „хаотична мешавина“ од радио, мобилен телефон, текстуална порака и е-пошта во текот на денот за да комуницира.
Исто така, комисијата наведе дека не е јасно кој ја имал крајната команда тој ден.
Културни прашања во рамките на агенцијата
Извештајот навлегува во работењето на агенцијата и прикажува слика на агенција која се бори да размислува критички за тоа како ја извршува својата мисија, особено кога станува збор за заштита на Трамп.
Комисијата наведе дека персоналот на агенцијата работи под претпоставка дека тие ефективно морале „да направат повеќе со помалку“. Во извештајот се наведува дека дополнителните безбедносни мерки преземени за заштита на Трамп по пукањето во Батлер требало да се преземат претходно.
„Да биде јасно, Комисијата не идентификуваше никаква злобна или злонамерна намера зад овој феномен, туку прекумерно потпирање на назначувањето на персонал врз основа на категории (поранешен, кандидат, номиниран) наместо индивидуализирана проценка на ризикот“, се наведува во извештајот на Комисијата.
Комисијата, исто така, го забележа „движењето напред па назад“ помеѓу лицата кои го обезбедувале Трамп и седиштето на Тајната служба во врска со тоа колку луѓе се потребни за да го заштитат.
Комисијата, исто така, обвини некои од високите кадри кои беа вклучени во митингот за, како што го нарекоа, „недостаток на преземање обврски“. Во еден пример, комисијата рече дека висок агент на самото место, кој имал задача да ги координира комуникациите, не шетал пред време на местото на митингот и не го информирал колегата од државната полиција пред митингот за тоа како ќе се одвиваат комуникациите.
Во него се наведува релативното неискуство на двајца конкретни агенти кои играле улога во обезбедувањето на митингот на 13 јули. Еден од нив беше агентот од лицата кои го обезбедувале Трамп, чија задача била да се координира со теренската канцеларија во Питсбург за безбедносно планирање за митингот. Комисијата наведе дека агентот дипломирал на академијата на Тајната служба во 2020 година и дека бил дел од тимот кој го обезбедува Трамп само од 2023 година. Пред митингот на Батлер, агентот има направено само „минимална претходна работа на локацијата или планирање на безбедноста на локацијата“.
Друг агент доделен да управува со систем за детекција на беспилотни летала ја користел технологијата само на два претходни настани.
Што препорача Комисијата?
Да имаат унифициран команден пункт на сите големи настани каде Тајната служба и другите претставници за спроведување на законот се физички на исто место; надземен надзор за сите настани на отворено; безбедносните планови мора да вклучуваат начин за ублажување на загриженоста на локацијата до 1 000 јарди (914 метри) и кој е одговорен за настанот; повеќе обуки за тоа како да се извлечат оние кои се под заштита од опасни сценарија.
Комисијата наведе дека на агенцијата и треба ново, надворешно раководство и обновен фокус на нејзината основна заштитна мисија, истовремено изразувајќи скептицизам дека агенцијата треба да продолжи со истрагите што моментално ги спроведува. Додека Тајната служба е добро позната по она што го прави за да ги заштити претседателите и другите достоинственици, таа исто така истражува финансиски криминал.
„Според мислењето на Комисијата, едноставно е неприфатливо Службата да има нешто помалку од најголем фокус на својата заштитна мисија, особено додека таа функција на заштитната мисија во моментов е неоптимална“, се вели во извештајот.
Членовите на комисијата беа Марк Филип, заменик јавен обвинител во времето на претседателот Џорџ В. Буш; Дејвид Мичел, кој служел во бројни државни и локални улоги за спроведување на законот во Мериленд и Делавер; Џенет Наполитано, секретарка за домашна безбедност во времето на претседателот Барак Обама; и Френсис Фрагос Таунсенд, помошник на Буш за домашна безбедност и антитероризам.
Директорот на Тајната служба вели дека ќе ги испитаат извештајот и препораките на Комисијата
Ја почитуваме работата на независната Комисија за испитувањето и внимателно ќе го испитаме извештајот и препораките објавени денеска, се наведува во писмената изјава на В.Д. директорот на Тајната служба на САД Роналд Л. Роу.
„Остануваме целосно посветени на соработката со Администрацијата, Одделот за домашна безбедност и Конгресот за да ги решиме неуспесите што придонесоа за обидот за атентат на поранешниот претседател Трамп на 13 јули во Батлер, Пенсилванија. Сепак, не чекаме да дејствуваме. Веќе значително ја подобривме нашата подготвеност, оперативните и организациските комуникации и имплементиравме засилени заштитни операции за поранешниот претседател и другите лица кои се под заштита“, се наведува во изјавата на Роу.
„Ова вклучува правење промени за подобро интегрирање со нашите државни и локални партнери за спроведување на законот и зголемување на нашата заштита со поддршка од Одделот за одбрана на САД и други агенции“.
Дополнително, вели Роу, развиле сеопфатен план со цел да се поттикне „фундаментална трансформација во рамките на Тајната служба за да се осигураме дека сме соодветно конфигурирани да ја извршиме нашата двојна интегрирана мисија за заштита и сложени истраги“.
„Овој план се фокусира на зголемување и задржување на персоналот на агенцијата, модернизирање на нашата технологија и градење план за обука кој е одржлив сега и во иднина“.
Агенцијата работи со Конгресот за да го зголеми буџетот на агенцијата за да можеме да ја направиме оваа промена, рече тој.
„Тајната служба на САД останува цврста во нашиот немилосрден фокус на исполнување на нашата критична мисија. Неизмерно сум горд на посветената работна сила на Тајната служба на САД. Мажите и жените од американската тајна служба одговараат на повикот да ги заштитат лидерите на нашата нација и главните кандидати додека оперираат во зголемена и сè подинамична средина за закана“, се наведува во писмената изјава на Роу.
