Русија во петокот изврши бран ракетни напади врз неколку украински градови, при што загинаа најмалку 18 лица, а беа повредени над 180 други, соопштија украинските власти.
Властите велат дека бројот на загинати најверојатно ќе се зголеми.
Украинскиот претседател Володимир Зеленски објави на X, порано познат како Твитер: „Денес Русија го користеше речиси секој вид оружје во својот арсенал: „Кинџалс“, С-300, крстосувачки ракети и беспилотни летала. ... Вкупно околу 110 проектили беа истрелани против Украина, при што повеќето од нив беа соборени“.
Зеленски рече дека една породилна болница била меѓу целите на рускиот удар.
Други цели вклучувале „образовни објекти, трговски центар, повеќекатни станбени згради и приватни домови, комерцијален склад и паркинг“.
Градовите што Русија ги погоди, според објавата на Зеленски, се Киев, Лавов, Одеса, Днепар, Харкив и Запорожје.
Експлозии се слушнаа низ главниот град на Украина рано во петокот, а градоначалникот Виталиј Кличко ги советуваше жителите на Киев да се засолнат.
„Киев Индипендент“ известува за шест ракетни експлозии во Харкив и експлозии од напад на беспилотно летало во Лавов.
Во објава на Телеграм, градоначалникот на Харкив Игор Терехов го опиша нападот како „масовен ракетен напад“.
Градоначалникот на Лавов, Андриј Садови, објави на Телеграм, дека неговиот град бил погоден најмалку двапати.
Доцна во четвртокот, избувна пожар во зграда во пристанишниот град Одеса на Црното Море, соопштија властите, откако беспилотните летала наводно се упатиле кон областа.
Руското министерство за одбрана во четвртокот соопшти дека нивните сили спречиле напад на два украински беспилотни летала насочени кон Крим.
Зеленски им се заблагодари на САД за новиот пакет помош од 250 милиони долари, велејќи дека воената помош ќе ги „покрие најитните потреби на Украина“.
„За да ја одбраниме слободата и безбедноста не само во Украина и Европа, туку и во САД, мора да продолжиме да одговараме на тековната руска агресија на најсилен и најодлучен можен начин“, објави Зеленски на X.
Администрацијата на Бајден во средата го објави последното повлекување на оружје и воена опрема за Украина од американските резерви според постојното претседателско овластување, со идна помош за Киев до Конгресот.
Пакетот вклучува муниција за противвоздушна одбрана, дополнителна муниција за високомобилни артилериски ракетни системи, артилериска муниција од 155 и 105 мм и противоклопна муниција, се вели во соопштението на државниот секретар Ентони Блинкен.
„Нашата помош беше клучна за поддршка на нашите украински партнери додека ја бранат својата земја и нивната слобода од агресијата на Русија“, рече Блинкен.
Дел од информациите во овој текст се од АП, агенцијата Франс-прес и Ројтерс
