Белорускиот претседател Александар Лукашенко денес изјави дека силите се ставени во состојба на висока готовност, додавајќи дека четири авиони наводно биле соборени над јужна Русија.
Лукашенко (68) ја посети централната команда на воздухопловните сили по речиси еднонеделно отсуство во јавност и по извештаите за наводна лоша здравствена состојба.
Лукашенко рече дека Белорусија ги ставила силите на готовс три дена по инцидентот во јужниот руски регион на границата со Украина.
„Поминаа три дена по настаните во наша близина, мислам во регионот на Брјанск каде беа соборени четири авиони“, рече Лукашенко без да даде дополнителни детали.
„Моравме да реагираме“.
Иако руското Министерство за одбрана не коментираше, Александар Богомаз, гувернер на областа Брјанск, рече дека хеликоптер се урнал во градот Клинци.
Во саботата, на руските социјални мрежи кружеше снимка од неколку руски авиони кои се урнаа во регионот на Брјанск. На едно видео се гледа како хеликоптер очигледно е погоден и се запали.
Во спротивставена изјава, Владимир Рогов, официјален претставник инсталиран од Москва во рускиот контролиран дел на Запорожје во јужна Украина, рече дека четири руски авиони биле застрелани од небото: два хеликоптери МИ-8, борбен авион СУ-35 и ловец-бомбардер СУ-34.
Лукашенко, кој е на власт од 1994 година, последен пат беше виден во вторникот во Москва на прославата на советската победа над нацистите.
Тој го прескокна ручекот што го приреди неговиот сојузник рускиот претседател Владимир Путин, како и неколку други настани минатата недела.
Белоруската опозициска лидерка Светлана Тихановскаја, која побегна во соседна Литванија по масовните протести на Лукашенко во 2020 година, се огласи на Твитер за да им порача на Белорусите дека треба да бидат подготвени за секој настан.
„За нас тоа значи само едно: треба да бидеме добро подготвени за секое сценарио“, рече таа. „Да се сврти Белорусија на патот кон демократијата и да се спречи Русија да се меша“.
„Ни треба меѓународната заедница да биде проактивна и брза“, додаде Тихановскаја.
Портпаролите на Лукашенко не го коментираа неговото отсуство од јавниот живот.
Минатата година Лукашенко ѝ дозволи на Русија да ја користи белоруската територија како лансирно поле за нејзината офанзива врз Украина.
Во 2020 година, тој тврдеше дека го добил шестиот мандат на изборите што поттикнаа стотици илјади Белоруси да излезат на улиците во знак на протест.
Неговиот режим го уништи невиденото протестно движење, затворајќи или туркајќи ги повеќето неистомисленици во егзил.
Извор: Агенција Франс-прес
