Белоруската опозициска лидерка Светлана Тиханоскаја, која ја предводи делегацијата на белоруската опозиција во Вашингтон, за Руската редакција на Гласот на Америка зборуваше за белоруското демократско движење и шансите белоруската армија да влезе во војната против Украина.
Гласот на Америка: Пред нешто повеќе од една година, светот изразуваше поддршка и солидарност со Белорусите кои се бореа за својата слобода. Сега многу луѓе ја нарекуваат Белорусија коагресор. Колку тоа ги комплицира животите на обичните луѓе и вашите како национален лидер?
Тиханоскаја: Ни требаше време по почетокот на војната да му објасниме на светот дека белорускиот народ и белорускиот режим се две различни нешта; дека белорускиот режим стана соучесник во оваа војна и сите оние кои се одговорни треба да сносат одговорност за тоа. Белорускиот народ се противи на оваа војна, тој е на страната на Украина и неопходно е да се изврши што е можно поголем притисок врз режимот, политички и економски притисок, да се поддржат луѓето во нивната борба. Нашата нација, нашиот народ и покрај огромното ниво на репресија во земјата, се обидуваат да ги поддржат Украинците колку што можеме. Видовме акти на саботажа на нашите партизани на железницата, минирање на руски авион за набљудување, акти на непослушност, ставање украински знамиња во Белорусија. Сето тоа чинеше многу. Во Белорусија секојдневно се приведуваат луѓе поради нивната антирежимска и антивоена позиција. Но, учеството на режимот во оваа војна не ја прави нашата нација учесник. Исто така, многу е важно да се разликува белорускиот народ од Русите, бидејќи 86 проценти од Белорусите се против учеството на Белорусија во војната и никогаш нема да ги видите овие знаци „З“ или „В“ на нашите улици. Ние ги сметаме Украинците за наша блиска нација и всушност се соочуваме со истиот непријател, империјалистички амбиции на Русија. И ние треба да се бориме заедно.
Гласот на Америка: Го нарековте Лукашенко марионета на Путин. Како тоа влијае на идните политики? Дали е во прашање самата независност на државата?
Тиханоскаја: Се бориме за слобода, суверенитет и независност на Белорусија. Белорускиот народ го направи својот избор уште во 2020 година. Ние сме против режимот, а сега по почетокот на војната, овој геополитички избор на Белорусите стана очигледен. Белорусите се чувствуваат како дел од европското семејство на земји. Сега Русија е поврзана со војна и сиромаштија, додека Западот е мир и безбедност. Луѓето сакаат нашата сакана Белорусија да биде просперитетна, безбедна земја, добар сојузник и партнер за нашите соседи. За ова се бориме. Белорусите не ја гледаат својата иднина со империјалистичка Русија. Мислам дека сите договори што се направени меѓу Лукашенко и Путин за овие две години не треба да се признаат како легитимни и треба да се занемарат. Значи, со ваква Русија нема иднина на ниту една демократска и слободна земја.
Гласот на Америка: Каква е можноста Белорусија да влезе во целосна војна со Украина во иднина?
Тиханоскаја: Значи, тука повторно треба да направиме разлика помеѓу режимот и Белорусија. Белорускиот режим веќе стана целосен соучесник во оваа војна. Лукашенко и неговите другари обезбедија на нашата територијална инфраструктура руската армија да ја нападне Украина. И тие треба да одговараат за ова. Треба да се отвори специјален суд против Лукашенко и сите оние кои учествуваа. Лукашенко мора да биде признаен како спонзор на тероризмот. Но, белорускиот народ, белоруската армија се против оваа војна. И ако на почетокот на војната имаше повеќе шанси белоруската армија да учествува во војната поради огромната тензија во регионот, сега стана очигледно дека белоруските војници не сакаат да се борат против Украинците. Тие не сакаат да убиваат или да бидат убиени за Лукашенко и Путин. Така, ова сценарио на учество на белоруската армија го гледам како минимално. Но, повторно, белоруската земја може да се користи во секој момент за лансирање проектили или повторно напад на Украина. Лукашенко е тој кој треба да сноси одговорност за ова.
Извор: Руска редакција на Гласот на Америка
