Американскиот претседател Џо Бајден изјави дека ќе побара од Конгресот федерално финансирање за обнова на мостот во Балтимор, откако претходно во него удри голем товарен брод. Бајден, на прес-конференција во Белата куќа, рече дека планира наскоро да го посети местото.
„Ќе го обновиме тоа пристаниште“, рече тој, нагласувајќи дека тоа е поддршка за 15.000 работни места.
„Ќе го обновиме тој мост што е можно поскоро“.
Тој рече дека нема причина да се сомнева во тероризам во врска со овој инцидент, и покрај бројни теории на заговор за причината за инцидентот на американските веб-страници.
Се верува дека осум лица на мостот, наводно сите дел од градежна екипа што ги пополнувала дупките на автопатот, паднале во реката Патапско за време на инцидентот, кој се случил утрово во 1:30 часот локално време.
Двајца од работниците се спасени, а едниот е хоспитализиран во тешка состојба, додека другиот не е повреден. Спасувачите продолжуваат да ги бараат другите шест лица, а нуркачите се соочуваат со температури на водата од околу 9 Целзиусови степени.
Гувернерот на Мериленд Вес Мур прогласи вонредна состојба и рече дека државата работи „со меѓуагенциски тим за брзо распоредување на федералните ресурси од администрацијата на Бајден“.
Градоначалникот на Балтимор Брендон Скот го нарече инцидентот „незамислива трагедија“.
Полицискиот комесар во Балтимор, Ричард Ворли, изјави дека „нема индикации“ оти судирот бил намерен.
