Милитантите Хути, поддржани од Иран, уште еднаш ги игнорираа повиците на САД да престанат да ги напаѓаат меѓународните бродски ленти оти ќе се соочат со последици, овојпат истрелувајќи шест противбродски проектили во Црвеното Море, од областите во Јемен, контролирани од Хутите, изјави американски официјален претставник за Гласот на Америка.
Официјалниот претставник, кој сакаше да остане анонимен, рече дека американските поморски сили собориле најмалку еден од проектилите денес, а други паднале во морето.
Според британска безбедносна фирма, едно од оружјата на Хутите предизвикало мала штета на пристаништето на товарен брод во британска сопственост, под знамето на Барбадос, за време на нападите денес.
Лансирањето на Хутите дојде неколку часа откако американската војска соопшти дека ги извршила своите најнови напади за самоодбрана против два беспилотни чамци кои биле натоварени со експлозив.
Централната команда на САД, која ги надгледува американските сили во регионот, рече дека бродовите „претставувале непосредна закана за бродовите на американската морнарица и трговските бродови во регионот“.
„Ние не сме во војна со Хутите. Ние не сакаме да влеземе во војна со Хутите, но ако тие продолжат со нападите, ќе продолжиме да ги нарушуваме и деградираме нивните способности“, изјави за новинарите вчера портпаролот на Пентагон, генералот Пат Рајдер.
Американските напади во неделата погодија повеќе крстосувачки ракети на Хутите.
Во саботата, САД и Велика Британија нападнаа најмалку 36 цели на Хутите во Јемен.
Хутите рекоа дека нивните напади на Црвеното Море се солидарни со луѓето во Газа и ветија дека ќе продолжат, и покрај американските и британските напади.
„Нашата војна против Израел е морална затоа што целта е да ги запре злосторствата на геноцид во Газа и да дозволи влез на храна, лекови и гориво за неговите опколени жители, а оваа цел ја претставува волјата на сите слободни луѓе во светот “, напиша Мохамед ал-Бухаити, функционер на Хутите, вчера на X.
Во меѓувреме, најновиот бран американски воздушни напади во Ирак, чија цел е напаѓње цели поврзани со речиси 170 напади на групите, поддржани од Иран, врз американските сили во регионот, се чини дека ја проширува разликата меѓу Вашингтон и Багдад.
Дел од информациите се од Асошиетед прес, Ројтерс и Франс-прес
