Да се прошири истрагата за групата на Љупчо Палевски, зашто нивните дејства се еднакви на тероризам и истите имаат криминално минато за кое требало многу порано да се реагира. Така смета универзитетската професорка од Факултетот за безбедност, Фросина Ташевска Ременски во разговор за Гласот на Америка.
„Таа група, според моите неофицијални информации, имала многу поголеми планови. Постоеле списоци за ликвидации. Постоеле списоци за изнуди. Постоеле списоци за заплашување, списоци за киднапирања, што значи дека ова е предизвик за истражните органи. Предизвик за полицијата, за безбедносните служби. Да ги осуетат плановите и да ги претстават во јавноста и тоа да им биде дополнителна одговорност во целиот овој случај“.
Според професорката можно е дека Палевски и неговата група имале и помонструзони планови:
Тие имаат позната криминалистичко-безбедносна и полициска историја
„Тие имаат позната криминалистичко-безбедносна и полициска историја, и не биле лица, коишто не биле претходно безбедносно третирани. Кога велам „безбедносно третирани“, мислам дека тие лица, во минатото во многу случаи биле предмет на еден постојан, континуиран оперативен надзор заради превенирање на вакви, слични планови коишто можеби биле и многу помонструозни“.
Сепак, Ременски прашува зошто надзорот врз нив не продолжил:
„Зошто и како е дозволено тој оперативен надзор да не продолжи, на начин на којшто требало да биде третиран, е прашање за другите институции. Не само прашање за полицијата, туку и на безбедносно разузнавачката заедница, имајќи во предвид фактот дека тие се легитимен, како и секаде во Европа и во светот, легитимен таргет за крајно десен и крајно лев екстремизам, којшто е предворје на тероризам“.
Професорката е категорична дека ефектите од грабнувањето и убиството на ученичката Вања се тактики на тероризам:
„Имате екстремна радикализација којашто се покажува со чинови на тероризам коишто, на почетокот можеби и не се квалификувани како тероризам. Еве, во овој случај имаме грабнување и убиство. Но, тие претставуваат и тактики на извршување на тероризам. Со цел да се предизвика општа, јавна вознемиреност, штети по социјалните односи, по меѓучовечките односи, недоверба во институциите, насочување на политички процеси“.
Негова поврзаност со политички и условно кажано, патриотски структури коишто се крстат во мајка Русија
Ременски ги поврзува активностите на Палевски и неговите соработници со про-руски влијанија.
„Но, фактот дека секое спротивставување на нашите стратешки интереси, а тоа е членството во ЕУ, и претходно, во НАТО доаѓаат токму од тие про-руски структури, коишто го користеа тој нивен, голем македонизам за правење на, можеби, најголемите злосторства и кон граѓаните и кон државата со самото тоа што станавме реално гнездо на тие надворешни, странски, би кажала, највеќе руски влијанија. Од тука се влечат и логиките за неговата поврзаност токму со тие политички и условно кажано, патриотски структури коишто се крстат во мајка Русија“.
Посочува и на потребата од пообемна истрага за целиот случај:
„После ваквите случаи, треба еден сериозен, институционален, координиран, организиран план на безбедносно разузнавачката заедница, со полицијата и враќање на класичното оперативно работење на терен, по однос на сузбивање на сè што значи радикален говор повикување на омраза, убиства и ликвидации, за коишто сведочиме години наназад на социјалните мрежи“, вели Ременски и додава:
Треба сериозен, институционален, координиран, организиран план на безбедносно разузнавачката заедница
„Ниту едно насилство не почнува со збор. Но, факт е дека има многу индикатори коишто говорат дека ова, реално, зад завесата се случувало“.
Според професорката, можно е пензионерот Панче Жежовски да знаел за активностите на групата:
„Од криминалистички и од оперативен аспект не држи до крај тезата дека 500-те евра долг и само земањето на автомобил, е причина за убиство. Тоа во ниту еден случај, во сите претходно истражени и докажани случаи на убиство, не може да биде причина. Затоа алудирам дека можеби тој бил дел од оваа петорка.. шестка.. не знам колку луѓе биле... Меѓутоа гледам по осомничените и приведените дека можеби го осуетил планот и претставувал ризик дека ќе бидат предадени од негова страна и бил предмет на ликвидација“.
Ременски посочува во истрагата да се земат објективно и сите семејни релации, вклучувајќи ги и однесувањата како на таткото, така и на мајката:
Не држи до крај тезата дека 500-те евра долг и само земањето на автомобил, е причина за убиство
„Дали мотивот е користољубие, убиство заради убиство, или има некои други, поголеми мотиви, тоа треба да го кажат надлежните институции да одговорат на сите овие прашања, меѓутоа во еден поширок формат, во којшто нема да биде поштедено од истражување и испитување однесувањето и на таткото, меѓутоа и однесувањето на мајката“, вели професорката и додава:
„Ние сме традиционално општество и во основа, секогаш велиме: Како може, дали е можно? Таткото или мајката? Сите лични релации се второстепени во однос на докажување на објективноста, во настаните и прибирањето објективни докази. Емоцијата е второстепена“.
Професорката, нагласува дека со целиот овој случај, безбедносните и разузнавачките служби во земјата се ставени на тест:
„Ова е лекција и за безбедносно разузнавачката заедница. Да си ги преиспитаат нивните постапки, досегашни. Соодветноста на нивниот третман на овие структури. И, секако, да дадат одговор на прашањата зошто ова лице, и до сега, поради бројните криминални поведенија во минатото не било предмет на ниту една посериозна постапка за истрага, а, да не зборам, за процесирање со судска разрешница“.
Да ги исчистиме сите структури коишто по принципот на труло јаболко знаат да направат дестабилизација
Сепак, Ременски додава и дека не треба да се губи довербата во институциите.
„Во сите институции има професионалци. Во сите институции има порив да се дојде до вистината. Наспроти други структури, коишто функционираат во истите тие институции, коишто можеби ја немаат истата цел“.
Има и порака и за идни постапувања кон, како што вели, безбедносните ризици за државата:
„Да ги исчистиме сите структури коишто по принципот на труло јаболко знаат да направат дестабилизација на интегритетот на институциите. И, секако, да се фокусираме таму каде што сме застанале. Да продолжиме да ги држиме под будното око сите оние коишто во минатото се покажале дека биле и се безбедносен ризик за државата“.
Facebook Forum