Моментумот денес се чини дека е на страната на американската потпретседателка Камала Харис, додека насобраните демократски законодавци, гувернери и финансиски донатори, ја изразуваат својата поддршка за таа да биде претседателски кандидат на партијата на изборите во ноември, откако претседателот Џо Бајден се откажа од изборната трка.
Бајден во објавата вчера даде поддршка за Харис да биде противкандидат на поранешниот претседател Доналд Трамп, кандидат на Републиканската партија.
Харис, која има 59 години, брзо објави дека ќе ја бара номинацијата.
Таа беше сенатор од најнаселената сојузна држава во земјата, Калифорнија, кога Бајден ја избра во 2020 година за свој потпретседател.
Излегувањето на Бајден од трката во 2024 година ќе ја преобликува претседателската кампања на демократите, само неколку недели пред Демократската национална конвенција.
Бајден собра речиси 4.000 демократски делегати за време на кампањата. Со поддршката за потпретседателката Камала Харис, Бајден ги охрабрува делегатите да гласаат за Харис, но од нив не се бара да гласаат за неа.
Пред најавата на Бајден, Демократската партија размислуваше да одржи виртуелно гласање на делегатите пред официјалната Демократска национална конвенција, која треба да се одржи од 19 до 22 август.
Доколку партијата го одржи виртуелното гласање и Харис добие мнозинство од гласовите на делегатите, таа ќе стане демократски претседателски кандидат.
Ако виртуелното гласање се одржи, но не се појави победник на мнозинството, одлуката се префрла на конвенцијата во август.
Демократската партија се соочува со тесна временска рамка за да се соедини околу нов кандидат и да организира конкурентна кампања за општите избори против Трамп и кандидатот за потпретседател Џеј-Ди Венс.
Бројни партиски функционери рекоа дека ја поддржуваат Харис да го замени Бајден против Трамп. Но, други сакаат да ја отворат Демократската национална конвенција следниот месец за други номинации.
Нејзиниот рејтинг на одобрување во националните истражувања во голема мера го одразува рејтингот на претседателот, но некои анкети на веројатните гласачи покажуваат дека Харис е малку подобара од Бајден против Трамп и, во неколку, таа е пред Трамп.
Харис во изјавата рече дека Бајден, со повлекувањето од трката против Трамп, „го прави она што го правел во текот на целиот свој животен век: ставајќи го американскиот народ и нашата земја над сè друго“.
„Ќе направам се` што е во моја моќ да ја обединам Демократската партија - и да ја обединам нашата нација - за да го поразиме Доналд Трамп“, рече таа.
„Имаме 107 дена до денот на изборите. Заедно, ќе се бориме. И заедно ќе победиме“.
Камала Харис веќе ги сруши бариерите, а наскоро би можела да стане првата црна жена што ќе биде претседателска номинација на голема партија, откако Бајден ја заврши својата кандидатура за реизбор.
ActBlue, водечка демократска платформа за собирање средства, соопшти доцна во неделата дека собрала 46,7 милиони американски долари во мали донации за кампањата на Харис само во неделата.
Тоа е во спротивност со неколкунеделната намалена поддршка за Бајден, особено меѓу главните донатори, по неговиот настап во дебатата против Трамп кон крајот на јуни.
Асоцијацијата на државните демократски комитети во соопштение рече дека „огромно мнозинство“ лидери на државните партии ја поддржале Харис како кандидат на партијата, а неколкумина се воздржале од процедурални причини.
Неделната поддршка за Харис вклучи и најмалку еден член на Кабинетот на Бајден, секретарот за транспорт Пит Бутиџиџ, кој рече дека ќе направи „се` што можам“ за да помогне во изборот на Харис.
Некои информации се земени од Асошиетед прес и Ројтерс
