САД денес најавија најнов пакет безбедносна помош за поддршка на Украина, рече портпаролот на Советот за национална безбедност Џон Кирби, на брифинг во Белата куќа.
„Ова е 52. пакет оружје и опрема што го испраќаме во Украина за да помогнеме во исполнувањето на итните потреби на бојното поле додека тие продолжуваат да се борат против оваа контраофанзива“, рече Кирби.
Тој најави дека „овој пакет вклучува повеќе артилерија, муниција за да ѝ помогне на Украина да ја одбрани својата територија и вклучува повеќе капацитети за воздушна одбрана за заштита на украинските градови и инфраструктура од руски ракети“.
„Реков пред некој ден, целосно очекуваме Русите да тргнат по енергетската инфраструктура. Значи, овие капацитети за воздушна одбрана треба да им помогнат да се одбранат од тие напади“, вели тој.
„Но, повторно, како што рече Карин, без дополнително финансирање ова оружје ќе биде меѓу последните што ќе можеме да ги испратиме, прекинувајќи ја поддршката и давајќи му на Владимир Путин токму она што тој го сака. Тоа би било само страшно, не само за народот на Украина, туку и за нашите сопствени национални безбедносни интереси и апсолутно за националните безбедносни интереси на нашите сојузници и партнери во Европа“, рече Кирби.
Претседателот Џо Бајден денес ги замоли републиканците за нова воена помош за Украина, предупредувајќи дека победата на Русија над Украина ќе ја остави Москва во позиција да ги напаѓа сојузниците на НАТО и може да ги вовлече САД во војна.
Тој сигнализираше подготвеност да се направат значителни промени во имиграциската политика на САД долж границата со Мексико за да се обиде да привлече поддршка од републиканците.
„Ако Путин ја земе Украина, нема да застане тука“, рече Бајден.
Путин ќе нападне сојузник во НАТО, предвиде тој, а потоа „ќе имаме нешто што не го бараме и што го немаме денес: американски војници да се борат против руските војници“, рече Бајден.
„Не можеме да дозволиме Путин да победи“, рече тој.
Белата куќа оваа недела предупреди дека на САД им снемува време и пари да ѝ помогнат на Украина да ја одбие руската инвазија.
Дел од информациите во текстот се од Ројтерс
