Американскиот претседател Џо Бајден со нетрпение очекува разговори со Шји Џјинпинг во „наредните недели“, му рече на кинескиот лидер денес највисокиот помошник во Белата куќа Џејк Саливан кога се состанаа на ретки разговори во Пекинг.
Саливан, првиот американски советник за национална безбедност што ја посетил Кина од 2016 година, се сретна со Шји при крајот на тридневните разговори во Пекинг. Тој се виде и со министерот за надворешни работи Ванг Ји и други високи функционери.
Неговата посета дојде додека Кина е вовлечена во безбедносни спорови со американските сојузници Јапонија и Филипини.
На состанокот со Шји денес, тој рече дека претседателот Бајден „со нетрпение очекува повторно да се ангажира со вас во наредните недели“.
„Претседателот Бајден е посветен на одговорно управување со овој значаен однос за да се осигура дека конкуренцијата нема да премине во конфликт или конфронтација и да работиме заедно онаму каде што се усогласуваат нашите интереси“, рече тој.
Кинеските државни медиуми соопштија дека Шји му рекол на Саливан дека и покрај „големите промени“, Кина и САД сè уште можат да уживаат добри врски.
„Посветеноста на Кина кон целта за стабилен, здрав и одржлив развој на односите меѓу Кина и САД не е променета“, рече Шји.
„Се надеваме дека САД ќе соработуваат со Кина за да се сретнат на половина пат“, додаде тој, според ЦЦТВ.
Вчера, Саливан и главниот дипломат Ванг разговарале за плановите нивните лидери да разговараат во наредните недели.
Тие, исто така, се спротивставиле околу се` понаметливиот пристап на Кина во спорните поморски региони.
Денес утрово, Саливан се сретна со високиот официјален претставник на кинеската армија во седиштето на Централната воена комисија во Пекинг, каде што двајцата разговарале за Тајван и за други прашања.
Саливан, исто така, ја истакнал важноста на „слободата на навигација“ во Јужното Кинеско Море, каде Кина и Филипини се судрија во последните месеци, и „стабилноста“ во Тајванскиот теснец, рече Вашингтон.
Во разговорите денес, Саливан изрази „загриженост за (кинеската) поддршка за руската одбранбена индустриска база“, се додава во соопштението во Белата куќа - повторувајќи ги долгогодишните тврдења на САД што Пекинг ги отфрли.
Тој, исто така, ја истакна „потребата да се избегне погрешна пресметка и ескалација во сајберпросторот, како и тековните напори за постигнување прекин на огнот и договор за заложници во Газа“, соопшти Белата куќа.
Посетата на Саливан доаѓа неколку месеци пред изборите во САД во ноември.
Од демократската претседателска кандидатка, потпретседателката Камала Харис, се очекува, доколку победи, да продолжи со пристапот на Бајден да бара дијалог со Кина, а истовремено да одржува притисок.
Нејзиниот републикански ривал Доналд Трамп вети, барем реторички, дека ќе заземе поцврст став, при што некои од неговите помошници гледаат далекусежна глобална пресметка со Кина.
