Соединетите Држави објавија странско воено финансирање од 500 милиони долари за Филипините, додека државниот секретар Ентони Блинкен и секретарот за одбрана Лојд Остин се сретнаа со лидерите во Манила за да ја зајакнат соработката за прашања како што се слободата на движење и сајбер безбедноста.
Говорејќи на заедничката прес-конференција по разговорите со нивните филипински колеги, Остин го нарече финансирањето „инвестиција што се случува еднаш во генерација“ за да помогне во модернизацијата на вооружените сили на Филипините.
Филипинскиот секретар за одбрана Жилберто Теодоро Јуниор рече дека воените инвестиции ќе ја зајакнат веродостојната одбранбена положба на земјата и ќе помогнат да се спречи „несакана и незаконска агресија“.
Блинкен рече дека и Соединетите Држави и Филипините, како и другите земји во Индо-пацифичкиот регион, споделуваат загриженост за кинеските ескалаторни акции во Јужното Кинеско Море и Источното Кинеско Море. Тој го поздрави неодамнешниот договор меѓу Кина и Филипините за спречување на судири околу Томас Шол Втори, окупиран од Филипините, велејќи дека таквите дипломатски резолуции треба да бидат „стандард, а не исклучок“.
„Живееме во неверојатно сложен момент и како резултат на тоа, партнерството меѓу нашите две земји е поважно од кога било и нашата посветеност да го развиваме сега и во годините што следат е решителна“, рече Блинкен.
Претходно, Блинкен и Остин ја зајакнаа посветеноста на САД за „почитување на меѓународното право во Јужното Кинеско Море“ додека се состанаа со филипинскиот претседател Фердинанд Маркос Јуниор.
„Секретарот Остин и секретарот Блинкен ја потврдија поддршката на САД за Филипините во одбраната на нивните суверени права, а двајцата официјални лица разговараа за важноста од зачувување на правата на сите нации да летаат, пловат и работат – безбедно и одговорно – каде и да дозволува меѓународното право“, се вели во соопштението на заменик-секретарката за печат на Пентагон, Сабрина Синг.
Портпаролот на американскиот Стејт департмент Метју Милер рече дека официјалните лица, исто така, ги подвлекле железните заложби на Соединетите држави кон Филипините според Договорот за заемна одбрана.
„Секогаш сум многу среќен што овие комуникациски линии се многу отворени, така што сите работи што ги правиме заедно, во однос на нашиот сојуз, во однос на конкретниот контекст на нашата ситуација овде, во Западното Филипинско Море и во Индо-Пацификот, континуирано се испитуваат и преиспитуваат, така што ние сме агилни во однос на нашите одговори“, рече Маркос на почетокот на разговорите со Блинкен и Остин.
Блинкен го истакна, како што го нарече, „постојано чукање на тапани на ангажмани на многу високо ниво меѓу нашите земји кои го покриваат целиот опсег на прашања и можности што нè зближуваат - не само во делот на безбедноста, туку и економски“.
Разговорите на Филипините беа најнови во серијата ангажмани во регионот, вклучително и состанокот во понеделникот меѓу Соединетите држави, Јапонија, Индија и Австралија, како и состаноците на САД и Јапонија.
Некои информации за овој извештај дадоа Асошиетед прес и Ројтерс.
Facebook Forum