Американскиот претседател Џо Бајден вчера објави дека го помилувал својот син Хантер, кој се соочуваше со казна овој месец во два федерални случаи.
Бајден претходно вети дека нема да презема такви дејства, но во изјавата рече дека потегот е одговор на, како што го нарече, селективно и нефер гонење.
„Обвиненијата во неговите случаи се појавија дури откако неколку мои политички противници во Конгресот ги поттикнаа да ме нападнат и да се спротивстават на мојот избор“, рече Бајден.
Хантер Бајден беше осуден за три кривични дела во јуни за набавка на пиштол во 2018 година. Обвинителите рекоа дека тој на федерален формулар лажно тврдел дека не користел илегално или оти бил зависник од дрога.
Тој, исто така, се изјасни за виновен во случај кога беше обвинет дека не платил најмалку 1,4 милиони долари данок.
Потегот на претседателот да го помилува Хантер во двата случаи, како и секое дело што тој го „направил или можеби извршил или учествувал“ во периодот од први јануари 2014 до први јануари 2024 година.
„Ги признав и преземав одговорност за моите грешки во најтемните денови на мојата зависност – грешки кои беа искористени за јавно да се понижат и срамат мене и моето семејство поради политичка игра“, рече Хантер Бајден во изјавата.
Претседателот Бајден во својата изјава рече дека се надева оти „Американците ќе разберат зошто татко и претседател би дошле до оваа одлука“.
„Во текот на целата моја кариера следев едноставен принцип: само кажете му ја вистината на американскиот народ. Тие ќе бидат фер. Еве ја вистината: јас верувам во правосудниот систем, но додека се борев со ова, исто така, верувам дека суровата политика го зарази овој процес и доведе до пропуст на правдата - и штом ја донесов оваа одлука овој викенд, немаше смисла од дополнително одложување“, рече Бајден.
Новоизбраниот претседател Доналд Трамп го критикуваше потегот, нарекувајќи го „злоупотреба и погрешна правда“.
Трамп, во доцните фази од неговиот прв мандат, го помилува Чарлс Кушнер, таткото на неговиот зет Џаред Кушнер. Меѓу другите помилувања на Трамп беа неговиот поранешен советник за национална безбедност Мајкл Флин, поранешниот менаџер на кампањата Пол Манафорт, поранешниот главен стратег Стив Банон и помошникот во кампањата Џорџ Пападопулос.
Некои информации во текстот се од Асошиетед прес и Ројтерс
