Лидерите на НАТО ќе го завршат Самитот во Вашингтон денес со јасен фокус на поддршката на Украина и спротивставување на, како што велат сојузниците, растечката закана што Русија ја претставува за Европа, како што американскиот претседател Џо Бајден се соочува со зголемени повици од членовите на неговата Демократска партија да се откаже од неговата повторна изборна трка.
Пред сесијата на Самитот посветена на Украина, 32-те земји од НАТО и лидерите на ЕУ ќе се сретнат со партнерите од таканаречената Индо-пацифичката четворка - Австралија, Јапонија, Нов Зеланд и Јужна Кореја - на дискусии кои се очекува да се фокусираат на заканите од Кина и Русија.
Бајден (81) попладне ќе одржи ретка самостојна прес-конференција, на која новинарите сигурно ќе ја преиспитаат неговата кандидатура на претседателските избори на 5 ноември, и покрај неговата надеж дека ќе ја смени ситуацијата опкружен со сојузничките лидери.
Настапот на Бајден во дебатата на 27 јуни против Трамп и нискиот рејтинг на јавноста предизвикаа нови сомнежи за неговата ментална подготвеност, при што девет демократски членови на Конгресот и еден демократски сенатор го повикаа да се повлече.
Европските лидери се загрижени дека ноемвриските претседателски избори во САД би можеле да донесат голема промена во поддршката на Вашингтон за Украина и НАТО.
Републиканскиот кандидат Доналд Трамп (78) ја доведе во прашање поддршката на САД за сојузниците и износот на помошта дадена на Украина за борба против руската инвазија.
Украинскиот претседател Володимир Зеленски, исто така, ќе одржи прес-конференција со генералниот секретар на НАТО Јенс Столтенберг, по двочасовната сесија со лидерите на НАТО, како и по средбите со републиканските и со демократските законодавци во американскиот Конгрес вчера.
САД вчера соопштија дека во 2026 година ќе почнат да распоредуваат ракети со поголем дострел во Германија, најмоќното американско оружје што ќе биде базирано на европскиот континент од Студената војна.
Во декларацијата на НАТО се вели дека сојузниците ќе обезбедат најмалку 40 милијарди евра (43 милијарди долари) воена помош за Украина во текот на следната година, иако тие не ја исполнија повеќегодишната обврска што Столтенберг ја побара.
Членките на НАТО, исто така, ветија дека ќе продолжат да ја поддржуваат Украина „на нејзиниот неповратен пат кон целосна евроатлантска интеграција, вклучително и членство во НАТО“.
Декларацијата на Самитот на НАТО остро ја критикуваше Кина, нарекувајќи ја „одлучувачки овозможувач“ на руските воени напори во Украина и велејќи дека Пекинг продолжува да поставува системски предизвици за евроатлантската безбедност“.
НАТО и четирите индо-пацифички земји треба да започнат нови заеднички проекти на Самитот - за Украина, вештачката интелигенција, дезинформациите и сајбербезбедноста.